PAREMOS O PP! Non votes contra ti e os teus dereitos



  • Despedimento masivo e máis barato pola reforma laboral
  • Máis despedimentos e por tanto máis paro
  • Suspensión dos convenios, baixada de salarios e máis horas de traballo pola mesma reforma
  • Perda da capacidade adquisitiva das pensións e retraso da idade de xubilación
  • Recurte das prestacións por desemprego e retraso na axuda a maiores de 52 a 55 anos
  • Recurte das prestacións sanitarias
  • Fomento da privatización do ensino e sanidade publica
  • Desaparición de miles de postos de traballo nos servizos públicos
  • Incremento do IRPF e do IVE, consecuencia: menos salario
  • Contrariamente, amnistía fiscal aos ricos defraudadores



MANIFESTACIÓNS 4 DE OUTUBRO
NON AO SAQUEO EXISTEN ALTERNATIVAS

VIGO - 20:00h - Vía Norte
CORUÑA - 20:00h - Praza de Vigo
PONTEVEDRA - 20:30h - Praza da Ferraría
FERROL - 20:30h - Avenida de Esteiro (local da CIG)
SANTIAGO - 20:30h - Praza Roxa
LUGO - 20:30h - Ronda da Muralla 58 (edificio sindical)
OURENSE - 20:00h - Pavillón dos Remedios
VILAGARCÍA - 20:30h - Casa do Mar

O BNG destina 30.000€ para acondicionar unha Ruta de sendeirismo entre O Saviñao e Pantón





“A provincia de Lugo ten potencial suficiente para converterse en referente turístico medioambiental e cultural de calidade. Na Ribeira Sacra conxúgase riqueza natural, historia e gastronomía e por iso é obxecto prioritario da política turística da Deputación de Lugo”. Así o manifestou o delegado de Cultura e Turismo da institución provincial e portavoz nacionalista na mesma, Mario Outeiro, na rolda de prensa posterior á Xunta de Goberno celebrada esta mañá , na que deu conta da aprobación de dous convenios de colaboración por valor de 80.000 euros para a dinamización turística deste enclave.

Un dos convenios aprobados é o relativo ao financiamento do proxecto ‘Ruta da Ribeira Sacra do Miño’ da Asociación Veciñal de Saviñao, dotado con 30.000 euros e centrado no acondicionamento e sinalización dunha ruta de sendeirismo de máis de 30 quilómetros polas marxes do río Miño ao seu paso polos concellos de Pantón e O Saviñao. 

O outro convenio está dotado con 50.000 euros e asinarase co concello de Monforte de Lemos para a promoción e dinamización do Centro do Viño. Grazas a esta colaboración a Deputación contribuirá a facer fronte aos gastos de xestión e mantemento do museo, do punto de información e da tenda do Centro.  “Dende a Área de Cultura e Turismo estamos dispostos a apoiar calquera iniciativa que converta ao Centro do Viño de Monforte nun centro de ocio, cultura, empresarial, turístico, de formación e gastronómico, sede de todas as actividades relacionadas cos viños da Ribeira Sacra. Debemos de recoñecer e poñer en valor o papel que o viño ten na cultura e na economía galegas”.

Feijóo non merece unha segunda oportunidade porque Galiza non pode perder catro anos máis


O candidato do BNG á presidencia da Xunta, Francisco Jorquera, afirmou durante a presentación da candidatura pola provincia de Lugo que Feijóo non se merece unha “segunda oportunidade” o próximo 21 de Outubro porque “Galiza non se pode permitir perder outros catro anos.”
Jorquera explicou que por primeira vez e sen que serva de precedente está dacordo con Feijóo en que nestas eleccións hai que xulgar só o seu balance de goberno, como afirmou onte nunha entrevista, pero advertiulle que o balance da súa xestión é un “cero patatero”.
Neste sentido, lembrou que Feijóo fracasou en todas as súas políticas e lamentou que logo de comportarse estes catro anos como un delegado do goberno español, un “delegado de Rajoy” en Galiza, agora faga un chamamento para que o 21-O non se xulguen outras políticas, “agora fuxe de Rajoy e pide que se xulgue só o seu balance de goberno”
Segundo rescate
O candidato nacionalista reiterou que as políticas da dereita, baseadas só na austeridade e nos recortes brutais, só traen consigo máis recortes e máis depresión da economía e criticou que malia esta realidade, que se pode constatar en Grecia e Portugal, Rajoy estea preparando o terreno para facer pasar como “normal” o segundo rescate.
“Onte mesmo -engadiu- o presidente do Eurogrupo advertiu de que este rescate vai traer consigo condicións durísimas pero Feijóo, sen embargo, aínda non se pronunciou”.
Feijóo vai concorrer a estas eleccións coa mesma estratexia que Rajoy, agachar o seu verdadeiro programa e eludir que o balance da súa xestión é de cero patatero
Para Jorquera, esta actitude do candidato do PP é reveladora de que vai concorrer a estas eleccións coa mesma estratexia de Rajoy, agachar o seu verdadeiro programa e os brutais recortes antisociais previstos para despois do 21 de Outubro.
“Feijóo debe aclarar tamén -dixo- se está diposto a pactar ou non con Mario Conde, malia que diga que non o levaría nas súas listas, unha alianza que sería a expresión do que está pasando nos últimos tempos, a alianza da dereita cos banqueiros de casino”.
Para facer fronte a este escenario, Jorquera defendeu un profundo cambio de rumbo, un novo tempo político que non sexa simple alternancia no goberno senón a aposta por políticas como as que propón o BNG, “que planten cara aos recortes e rexeneren a democracia”.
Cosme Pombo
Pola súa parte, o cabeza de lista pola provincia, Cosme Pombo, comprometeuse a levar ao Parlamento a mellor ferramente que ten a provincia para defender os seus intereses, “e esa ferramente é o BNG”, dixo.
Pombo asegurou que o BNG ten entre as súas prioridades poñer o País a producir e reivindicar tanto os seus sectores productivos como o seu rural, e fixo unha mención especial ás dificultades que está atravesando Alcoa e o ensino no rural.
Isabel Sánchez, candidata número 2, reivindicou a pluralidade das listas nacionalistas e amosouse convencida de que hai outras solucións para virar as políticas de dereitas e “en bloque podemos” poñelas en marcha.


Celebrando os 30 anos do BNG en Lugo Sur


Os candidatos ao Parlamento de Galiza Cosme Pombo e Isabel Sánchez xunto co responsábel comarcal Ricardo Rodicio no momento das intervencións

O día 26 de setembro de 1982, no Frontón de Riazor da Coruña foi fundado o BNG, conformándose como una fronte política unificadora do nacionalismo galego, baixo o lema “Por una fronte ampla da unidade nacionalista”
Naquela  I Asemblea aprobáronse os obxectivos estratéxicos e políticos do BNG.
O nacionalismo como resposta a una situación de dependencia económica, e contra a opresión cultural e política que sofre Galiza e que imposibilita a transformación e  o benestar da sociedade galega.
Galiza, como nación, ten dereito á autodeterminación e ao exercicio da soberanía nacional, a defensa da democracia e dos intereses populares e a necesidade de autoorganización política e social.
Atrás queda a loita contra a entrada na OTAN, contra o desmantelamento industrial (reconversión), contra a apropiación e manipulación dos restos de Castelao, Tratado de Maästricht,  a Plataforma Nunca Máis, a Plataforma Queremos Galego, etc. Tamén debemos recordar que no ano 2005 o BNG formou parte do Goberno da Xunta por primeira vez na historia.
Hoxe 30 anos despois daquela I Asemblea do BNG , despois de “30 anos sumando esforzos por Galiza” celebramos en Monforte a  Festa do BNG da Comarca de Lugo-sul.
Aspecto da comida donde participaron máis de 150 persoas
O PP coa excusa da crise, aproveita para arrasar con dereitos sociais e laborais. Condenan ao noso país ao abandono da economía produtiva, ou dito doutra maneira, queren ditar sentenza de morte a un futuro digno na nosa nación.
O BNG confía no noso pobo, na nosa capacidade, tendo en conta tamén,  que somos a única alternativa real fronte ás políticas de recorte do PP que están a afundir a Galiza.
O día 21 de outubro haberá Eleccións ao Parlamento de Galiza. Temos unha oportunidade que non podemos desaproveitar. Temos que dicir non a Feijóo.  Pois dicir non a Feijóo é dicir non a Rajoy e as súas políticas de recortes que solo conducen a máis miseria. O día 21 de outubro a sociedade galega ten que prantarlle cara ao PP e  aos recortes.
 “O día 21 de outubro a Galiza indomábel e insubmisa protagonizará un cambio político da mán do BNG” En Bloque podemos!!!

O BNG rexista senllas iniciativas no Parlamento e no Congreso a prol do referendo contra o Recortazo


O Bloque Nacionalista Galego apresentou este luns no Parlamento galego e no Congreso senllas iniciativas para que o brutal Recortazo do Goberno Rajoy se submeta a referendo.
Así o anunciaron en conferencia de imprensa o candidato do BNG á presidencia da Xunta, Francisco Jorquera, e a portavoz do grupo parlamentar nacionalista, Ana Pontón.
«O que propón o PP é máis centralismo e menos democracia. O BNG propón, en troca, máis autogoberno e referéndum. Que as e os cidadáns tomen a palabra», resumiu Francisco Jorquera.
O Recortazo é perfeitamente evitábel 
O candidato nacionalista negou a maior, refutou a tese de Rajoy de que o Recortazo é inevitábel.
Jorquera pide que se «pinche xa» a burbulla da débeda
«Claro que outras políticas son posíbeis. A política de recortes non é inexorábel. Hai outras opcións», afirmou, antes de achegar o dado de que a fraude fiscal por ano ascende no Estado español a 85.000 millóns de euros. Se se recadasen non sería preciso ningún recorte. 
Esa monstrosa cantidade é moi superior á cantidade -65.000ME- que o Goberno Rajoy vai recortar. «Portanto, claro que hai alternativas!», enfatizou Jorquera, o problema é que Feijóo prefire «recortar o benestar» antes de «recortar a fraude fiscal»
Superar a falsa austeridade
Para Jorquera, a nova onda de recortes decretada por Rajoy vai traer consecuencias devastadoras para a economía. «A recesion virará en grande depresión», vaticinou, ao tempo que preconizou «superar a mal chamada política de austeridade que se vén praticando desde o comezo da crise porque, como se está a ver, só provoca máis crise, máis recesión e máis paro».
O líder nacionalista propuxo tamén que «se pinche xa» a burbulla da débeda pública, algo perfeitamente posíbel se houber vontade política.
«Necesitamos un Banco Central europeu que sexa realmente un banco central. Non é de recibo que a función básica do BCE sexa a de ser a financeira da banca privada», denuncia Jorquera, quen ao mesmo tempo reprobou que «os Estados centrais da UE», dixo en alusión a Franza e Alemaña, se estean a financiar «a custo praticamente cero mentres a periferia, e o Estado español, paga xuros no entorno do 7 por cento».
A insensibilidade de Rueda
Por súa parte, a portavoz do grupo parlamentar do BNG, Ana Pontón, deu cumprida resposta ás declaracións realizadas onte por Alfonso Rueda e segundo as cais os recortes non están a tocar o fundamental (!!).
«Recortar as prestacións polo desemprego non é tocar o fundamental? Despedir a miles de persoas no sector público non é tocar o fundamental? Reducir os salarios a millóns de persoas non é tocar o fundamental?», perguntouse Ana Pontón, quen instou ao conselleiro de Presidencia a que se retracte delas.
O discurso de Feijóo xa non se ten de pé
De por parte, Jorquera afirmou que «o discurso de Feijoo xa non se ten de pé», en relación ao voto afirmativo da Xunta de Galiza aos recortes no Consello de Política Fiscal e Financeira.
«Non se ten de pé porque el dicía que a suposta solvencia financeira de Xunta a ía eximir da realización de novos recortes. Pero logo el vota a favor deses recortes no CPFF!», censurou Jorquera.
Por un 25-X masivo e de contestación ao Recortazo
Jorquera e Pontón fixeron un chamamento á sociedade galega a que secunde masivamente a manifestación que o BNG convoca para o 25 de Xullo en Santiago (12 h, A Alameda), de forma que se erga un berro cívico contra un Recortazo que significa á vez unha agresión sen precedentes contra os dereitos sociais e un ataque brutal ao autogoberno galego.

A CIG convoca mobilizacións para o 19 de xullo e chama a unha folga xeral conxunta en setembro

A CIG manifesta que ante a gravidade dos recortes cómpre dar, na rúa, unha resposta igual de contundente. Por iso o secretario xeral, Suso Seixo, anunciou a convocatoria de manifestacións-cazoladas en todas as cidades o vindeiro xoves 19 de xullo e dunha folga xeral en setembro. A CIG contactará coas organizacións sindicais, nomeadamente coas máis representativas e maioritarias, para intentar fixar un calendario conxunto de mobilizacións de cara a esa convocatoria que entende debe ser a nivel de estado. De non acadar un acordo, intentará levala adiante procurando facela coincidir coa posíbel convocatoria de organizacións sindicais nacionalistas, noutros territorios do estado.

O BNG vai lanzar unha «auténtica ofensiva social» contra o Recortazo

O BNG vai lanzar unha «auténtica ofensiva social» contra o Recortazo. «Rajoy pide comprensión. Pois ben: ningunha comprensión. Oposición frontal. Rebelión. Insumisión», clamou Guillerme, quen anunciou que o BNG estará na rúa, acarón da maioría social que vai ser quen pague en solitario a factura da crise.


O Goberno Rajoy non ten lexitimidade democrática para aplicar un programa, o do Recortazo, que ninguén votou e que vén imposto por poderes non democráticos nin eleitos polo pobo.
Nestes termos pronunciáronse hoxe en conferencia de imprensa o portavoz nacional e o candidato do BNG á presidencia da Xunta -Guillerme Vázquez e Francisco Jorquera, respectivamente- quen compareceron ante os meios logo dunha xunta extraordinaria da Executiva Nacional convocada para analisar os efeitos do Recortazo.
«O BNG», anunciou Guillerme, «levará ao Congreso iniciativas para que o Goberno do Estado convoque un referéndum. E se non, que convoque eleccións anticipadas. Sería o lóxico e o democrático».
Jorquera descualificou o Recortazo non só por ser absolutamente contrario aos intereses da maioria da poboación, senón por ser inútil para superar a crise. Antes ao contrario, «con estas medidas pasaremos da economía da recesión á economía da depresión», criticou, «e nin sequera servirán para recortar o déficit porque coa depresión cairán os ingresos públicos».
Monarquía
O candidato do BNG á presidencia da Xunta criticou tamén o que cualificou de «utilización espúrea» da Monarquía por parte do Goberno do Estado (hoxe El-Rei preside o Consello de Ministros), utilización que é posíbel «grazás á cumplicidade de El-Rei», reprobou.
Denunciou tamén a atitude absolutamente repudiábel das e dos deputados do PP que no Congreso aplaudiron a adopción de medidas que prexudican gravemente á inmensa maioría da xente, «con expresións tan incualificábeis como a de que se jodan», dixo.
Aplausos a medidas antisociais, aplausos á guerra 
Esas imaxes lembráronlle ao líder nacionalistas outras do mesmo teor protagonizadas pola bancada popular, cando, sendo Aznar presidente do Goberno, romperon a aplaudir o desencadeamento da ilegal guerra en Iraque, conflito saldado coa morte de miles de civís inocentes.
Fuxida de Feijóo, obediente a Génova
Jorquera tamén tivo palabras para avaliar o voto favorábel da Xunta de Galiza ao Recortazo que o Goberno Rajoy impón á Administración galega, no Consello de Política Fiscal e Financeira celebrado onte.
«Feijóo prima a súa obediencia aos ditados de Génova aos intereses de Galiza. Feijóo ten a mirada máis posta en Madrid que en Galiza e na situación actual aínda por riba foxe a América Latina», dixo Jorquera. «Feijóo demite das súas responsabilidades cando foxe a América no canto de explicar aos galegos por que lles recorta o benestar», denuncia.
A débeda das comunidades, só o 19 por cento da total 
Jorquera estima que non hai ningunha razón para impor á administración galega un novo recorte. «O déficit das comunidades autónomas é inferior á percentaxe do gasto que teñen que administrar e a súa débeda é en termos relativos moi inferior á da Administración central, apenas é o 19 por cento da débeda pública total», ilustrou o candidato nacionalista.
Así as cousas, o Goberno do Estado utiliza a crise como coartada para impor as súas políticas centralistas -evidentes ao reforzar as deputacións-, políticas que ademais son antisociais porque, salientou Jorquera, «a Xunta administra precisamente os peares básicos do Estado social».