VICEPRESIDENCIA TEN VALORADO MÁIS DO 90% DAS SOLICITUDES DE DEPENDENCIA DE 40.000 GALEGOS E GALEGAS ESTÁN A SER ATENDIDOS POLO SISTEMA GALEGO DE BENES

O Sistema Galego de Atención á Dependencia ten valorado a 41.881 persoas con dependencia, o 90,35% das solicitudes presentadas, que a día de hoxe ascenden a 46.353. Estas cifras sitúan á comunidade galega como a terceira do Estado con maior número de dependentes valorados, só por detrás de Andalucía e Cataluña, que superan ao noso país en poboación.
En canto á atención ás persoas dependentes, un total de 39.233 galegos e galegas están a beneficiarse xa das prestacións do Sistema Galego de Benestar dentro da área de autonomía persoal. Entre estas, inclúense as 2.222 que xa perciben a libranza do coidador, o pagamento para coidadores habituais de dependentes que se contempla no catálogo de servizos do Sistema Galego de Atención á Dependencia.
Neste senso, a Vicepresidencia lembra que é un erro falar unicamente de “cobro” para referirse ás prestacións para a dependencia, posto que o catálogo de servizos ao que teñen acceso os dependentes galegos é moito máis amplo que a paga da libranza do coidador, e inclúe todas as prestacións e servizos recollidos na libranza da dependencia (centros de día, residencias, axuda no fogar, teleasistencia...) e na libranza do asistente persoal.
Respecto deste catálogo de servizos, a Vicepresidencia ten feito un importante esforzo para a mellora das prestacións e a súa cobertura. Como exemplo, cómpre salientar o programa de Axuda no Fogar, que pasou de 15 millóns de euros en 2005 a 35 millóns neste ano; ou o de Teleasistencia, que conta agora con 2 millóns de euros fronte aos 250.000 euros de 2005.
Por outra parte, entre o labor desenvolvido en materia de infraestruturas para o benestar, a Vicepresidencia ten posto en marcha unha Rede Galega de Centros de Día, que a día de hoxe xa acada os 55 equipamentos e 2.000 prazas. Este é o principal fin ao que se están a destinar os 60 millóns de euros que o Estado achegou a Galicia para saldar a débeda histórica coa nosa comunidade en materia de benestar, como froito da reclamacións e do traballo feito polo departamento que dirixe Anxo Quintana.
En canto ao financiamento da Lei de Dependencia, Vicepresidencia recorda que Xunta e Estado teñen que aportar os fondos ao 50%. A este respecto, o departamento autonómico ten achegado este ano 100 millóns de euros para a atención á dependencia a través do Sistema Galego de Benestar dos orzamentos da Xunta. A estes que hai que sumar 30 millóns de euros que a día de hoxe suman o conxunto das partidas aportadas a Galiza polo Estado para este fin, unha cifra por parte de Madrid que está moi lonxe do 50% comprometido.
Neste senso, é oportuno lembrar que na última reunión en Madrid do Consello Territorial da Dependencia, o pasado 23 de xullo, o Estado anunciou un recorte dos fondos do nivel acordado para financiar o custo dos servizos de dependencia, que pasaron de 430 a 241 millóns. Así, dos 872 millóns de euros para o financiamento do sistema de dependencia, había un principio de acordo co Estado para establecer o reparto destes fondos nun 50% para o nivel mínimo (o que recibe cada Comunidade Autónoma por cada persoa valorada e con prestación recoñecida) e outro 50% para o nivel acordado (a repartir entre as Comunidades co obxectivo de financiar o sistema público de atención á dependencia, centros, prazas e todos os servizos recoñecidos na Lei como dereitos). Desta última cifra, que ascendería a 430 millóns de euros, o Estado só vai achegar agora 241.
Nesta situación, o vicepresidente da Xunta, Anxo Quintana, ten anunciado que na próxima xuntanza da Comisión Delegada de Dependencia en Madrid, que terá lugar o 4 de setembro, proporá a celebración dun Consello Territorial da Dependencia, que debería convocarse tamén no mesmo mes de setembro, no que se fixe con claridade cal é a cantidade que o Estado vai achegarlle a Galiza en 2009 para atención á dependencia, a fin de que se contemple nos Orzamentos Xerais do Estado.
Aínda así, o vicepresidente da Xunta, en nome do Goberno galego, ten garantido que sexa cal sexa a resposta do Goberno do Estado todos as persoas dependentes de Galiza con dereito a prestacións terán garantido o acceso aos servizos que lles corresponden.

“GALIZA TEN TANTO DEREITO COMA CATALUNYA A NEGOCIAR DE TI A TI OS ORZAMENTOS CO ESTADO ESPAÑOL”


O vicepresidente da Xunta de Galiza, Anxo Quintana, declarou hoxe que “Galiza ten tanto dereito coma Catalunya a negociar de ti a ti os orzamentos co Estado español, xa que merece o mesmo trato e o mesmo modelo de negociación ca esa comunidade e así ter as mesmas posibilidades”.

Anxo Quintana asegurou que cando mañá chegue a Galiza o presidente do Estado español, José Luis Rodríguez Zapatero, se atopará “cun Goberno, o galego, con moita fortaleza” porque ademais de poder falar no nome de todos os galegos “pode falar no nome de Galiza e de todos os partidos políticos con representación no Parlamento sobre catro temas chave: a negociación dos orzamentos do Estado, a mellora do autogoberno, o retraso das obras do AVE en Galiza e a reforma do voto emigrante”.

O líder nacionalista dixo que a visita de Zapatero a Galiza “é unha boa ocasión para que anuncia novos traspasos para mellorar o autogoberno de Galiza”. Así, pediulle ao presidente do Estado que “anuncie o traspaso inmediato en materia de tráfico e de seguridade viaria”, xa que como sae nos medios estes días vese que o Estado “rouba e recada en Galiza moito máis do que inviste en materia vial”.

Quintana tamén dixo que dende o Goberno galego “cren na súa palabra e na súa boa intención e non teñen motivos para non crer”, pero o vicepresidente pediulle a Zapatero que coa súa visita se decate de como van as obras do AVE e que anuncie, sen “necesidade de que gaste máis queroseno en voos, a creación da Comisión de seguimento das infraestruturas galegas e das obras do AVE” dándolle así a razón “ás tres forzas políticas galegas con representación no Parlamento, que foron unánimes neste tema”.

Voto emigrante e eleccións

Ademais Anxo Quintana requiriulle a José Luis Rodríguez Zapatero que non desbote a oportunidade que ten mañá de afondar máis “na transparencia democrática” e anuncie xa a reforma da lei do voto emigrante.

Quintana declarou que Zapatero “ten que actuar como un demócrata e ten que dar a razón ás forzas políticas galegas, que pediron esa reforma, e anuncie que os galegos da diáspora poidan votar en urna nas vindeiras eleccións”.Quintana tamén dixo con respecto á visita de Zapatero que “cada un faga as interpretacións que vexa oportunas” pero que a el “non lle comunicaron dende ningunha parte, nin dende o Goberno galego, nin dende o PSOE, ningún adianto electoral”.

Concurso eólico

O vicepresidente da Xunta de Galiza tamén dixo na rolda de prensa que o Goberno galego fixo “un concurso eólico público onde calquera empresa podía presentarse para obter as concesións de explotación da enerxía eólica”, así que non entende como o PP agora se “dedica a difamar e a desprestixiar ese concurso xa que todos se poden presentar, porque é aberto e público”.

A PROPOSTA DO PSOE DE VOTO ELECTRÓNICO NON É MÁIS QUE UNHA MANOBRA PARA NON IMPLANTAR O VOTO EN URNA PARA OS EMIGRANTES

O portavoz do BNG no Congreso dos Deputados, Francisco Jorquera, advertiulle hoxe ao Goberno Central de que “non utilice agora a promesa de implantar o voto electrónico como unha manobra de distracción para non implantar con carácter de urxencia o voto en urna para os residentes ausentes”.
Francisco Jorquera accedeu a retirar hoxe na Deputación Permanente do Congreso dos Deputados a petición do BNG de celebración dunha reunión extraordinaria da Comisión Constitucional para reformar a LOREX no referente á implantación coa máxima urxencia do voto en urna para os residentes ausentes en aras a un acordo entre todos os partidos políticos: que a Comisión Constitucional se reúna na primeira semana de setembro para crear a subcomisión de reforma do réxime eleitoral xeral e a que o primeiro Pleno do Congreso, a celebrar os días 10 e 11 do mesmo mes, poida ratificar a creación desa subcomisión.

Jorquera subliñou que “é imprescindíbel garantir o voto libre e secreto dos 350.000 galegos e galegas inscritos no CERA e iso só se pode facer homologando o sistema de voto no exterior e no interior; é dicir, establecendo o voto en urna como opción preferente”.

“No BNG –recalcou- consideramos que non hai tantas dificultades técnicas como se argúen para implantar o voto en urna no prazo máis breve posíbel”.
“Sospeitamos que a proposta de voto electrónico é unha manobra de distracción para non implantar con urxencia o voto en urna”
Neste sentido, o parlamentario nacionalista manifestou o “escepticismo” do BNG ante a insistencia do PSOE e da Vicepresidenta do Goberno en implantar o voto electrónico para os residentes ausentes.
Asegurou que “pode ser unha solución a longo prazo, pero a curto prazo a súa implantación é difícil. Non hai máis que ver en que despois de 30 anos de democracia, e malia as continuas iniciativas do BNG, o persoal embarcado, un colectivo moitísimo menor que o CERA, aínda non poida votar, a pesar de que aí o voto electrónico si que podería ser un mecanismo fácil de implantar”.
Por iso, Francisco Jorquera advertiu de que “non nos gustaría que o voto electrónico sexa unha manobra de distracción para non abordar a reforma con carácter de urxencia”.

O GOBERNO CENTRAL ADMITE QUE TRÁFICO RECADA EN GALIZA DEZ VECES MÁIS DO QUE DESTINA A SEGURIDADE VIARIA

O BNG cre que as altas percepcións son o motivo das "reticencias" do Executivo de Zapatero á transferencia das competencias nesta materia

En resposta a unha pregunta do portavoz do BNG no Congreso dos Deputados, Francisco Jorquera, o Goberno recoñece que a recadación da Dirección Xeral de Tráfico en Galiza é dez veces superior ao que inviste no noso país en seguridade viaria.

En concreto, segundo os dados do Goberno referidos ao último ano disponíbel, o 2007, os investimentos de Tráfico en seguridade viaria en Galiza ascenderon a 3.100.248 euros. Pola contra, a recadación do Goberno por infraccións ascendeu no mesmo ano a 32.071.731 euros.
Ademais, a información do propio Goberno desvela que “nos últimos tres anos o investimento de Tráfico en medidas de seguridade viaria en Galiza diminuíu mentres que a recadación medrou”, denuncia o BNG.
Así, o investimento en seguridade viaria pasou de 3.378.450 euros en 2005 a 3.100.248 euros en 2007. Pola contra, a recadación da dirección xeral de Tráfico no noso país medrou nos últimos tres anos, pasando de 27.322.921 en 2005 a 32.071.731 euros o pasado ano.




Transferencia de competencias


Ante isto, Francisco Jorquera dixo que “esperamos que as constantes reticencias do Goberno central a transferir Tráfico e Seguridade Viaria a Galiza non teñan que ver con esta situación”.
Ademais, o nacionalista considera que “esta situación é inadmisíbel: non é de recibo que cando Galiza sofre un dos índices de sinistralidade viaria máis elevados do Estado, o Goberno Central recoñeza que o investimento en seguridade viaria non só non medrou, senón que diminuíu, mentres que a recadación se incrementou en todas as provincias galegas”.
O portavoz do BNG subliña que Galiza precisa “dunha policía propia que dea resposta a unha realidade, a problemática do tráfico en Galiza é moi diferente: poboación dispersa; rede moi densa de estradas secundarias, con trazados sinuosos, numerosos cruces e travesías; alta porcentaxe de poboación que vive no rural; elevada pluviosidade ou a orografía accidentada.”

Neste sentido, lembra que “o Goberno Central segue facendo ouvidos xordos ao acordo unánime do Parlamento Galego demandando a transferencia das competencias de tráfico e seguridade viaria a Galiza, houbo un compromiso do anterior ministro de Administracións Públicas, Jordi Sevilla, de transferir a Galiza esta competencia”.

“Esperemos que as continuas reticencias do Goberno Central as transferir a Galiza as competencias de Tráfico e Seguridade Viaria non teñan que ver con estes contundentes dados sobre a recadación de Tráfico en Galiza e os investimentos en seguridade viaria no noso país”, concluiu Jorquera.

O BNG CONSIDERA "INSUFICIENTES E DECEPCIONANTES" AS MEDIDAS ECONÓMICAS APROBADAS POLO GOBERNO

O portavoz do BNG no Congreso dos Deputados, Francisco Jorquera, considera que as medidas aprobadas polo goberno “son insuficientes e decepcionantes e non parece que vaian ter entidade para facilitar a recuperación da economía”.
“Son medidas decepcionantes porque, no canto de atender ás persoas que viven dun salario, ás familias que teñen que afrontar unha hipoteca, isto é, á maioría social (non hai ningunha medida para elas), o Goberno, o que fai é beneficiar aos rendementos máis altos coa aprobación da supresión do imposto de patrimonio que só pagan aqueles contribuíntes que teñen un patrimonio superior a 600.000 euros”, critica o portavoz do BNG no Congreso dos Deputados.

“MEDIDAS NEGATIVAS PARA A LEI DE DEPENDENCIA E PARA O FINANCIAMENTO DAS CCAA”
Ademais, Francisco Jorquera considera que “esta política de recortes fiscais é negativa para as políticas sociais, como xa se está a demostrar co recorte de recursos para a aplicación da Lei de Dependencia, e tamén para a mellora do financiamento das Comunidades Autónomas, dotándoas de máis recursos”. “Compre lembrar –engade- que isto é tanto como dicer: mellorar a calidade dos servizos que prestan estas administracións: a educación, a sanidade, etc”.
En canto ás axudas ás pequenas e medianas empresas, o portavoz do BNG no Congreso considera que “son de escasa entidade e, ademais, articúlanse a través de créditos, asi que non parece moi probábel que beneficien aos empresarios que non queren endebedarse máis”. Por último, Francisco Jorquera critica que as medidas traspoñan tamén a directiva Volkenstein “que suporán a desrregulación e máis precariedade laboral, ou tamén a axilización nos trámites de declaración de impacto ambiental, que abren a porta a posíbeis deterioros do noso contorno”.