A Alianza Social Galega chama a cidadanía a concentrarse o 20 de decembro en Monforte

As máis de 60 entidades que conforman a Alianza Socia Galega fixeron esta mañá, en rolda de prensa, un chamamento a participar nas mobilizacións convocadas para o vindeiro xoves, día 20 de decembro, nas principais cidades e cabeceiras de comarca. Mobilizacións coas que se queren denunciar as políticas antisociais que está a adoptar o goberno do PP e entre as que salientaron a non revalorización das pensións, os recortes na sanidade e no ensino públicos e a contrarreforma ideolóxica que representan a LOMCE ou Lei de taxas xudiciais. Como parte das reivindicacións tamén estará a esixencia de reformar da normativa hipotecaria para pór fin ao drama dos desafiuzamentos e lograr a dación en pagamento.




O secretario xeral da CIG, Suso Seixo denunciou que todas as medidas que se veñen impoñendo, lonxe de axudar a saír da crise, teñen provocado un incremento do desemprego, da precariedade e da exclusión social e lembrou que as previsións para os próximos anos non permiten tampouco ser moi optimistas.

Alén diso, subliñou que o PP está a proveitar a crise para introducir o modelo ideolóxico “da dereita máis reaccionaria do Partido Popular”. Un modelo que cualificou de “inxusto, clasista e centralista”.
A modo de exemplo, sinalou o Anteproxecto de Lei Orgánica de Mellora da Calidade Educativa (LOMCE), do que dixo que favorece o ensino privado-concertado mentres castiga o público, favorecendo a quen ten máis poder económico e co obxectivo de restar competencias ás comunidades autónomas.
Do mesmo xeito, subliñou que as reformas que se pretenden introducir na xustiza nada teñen que ver coa crise. “Teñen tamén o obxectivo de dificultar o acceso a ela por parte das persoas máis desfavorecidas, facendo a xustiza 
O secretario xeral da CIG, Suso Seixo denunciou que todas as máis elitista e clasista”, dixo.
Ante esta situación, o secretario xeral da CIG denunciou o retroceso non só das condicións laborais e sociais da poboación, senón tamén dos dereitos e liberdades. Alertou de que se no estado español non medran as forzas de extrema dereita no estado español, como ocorre no resto dos países da periferia europea máis afectados pola crise, é porque “están dentro do PP” e apuntou os “tics típicos da época franquista” que se poden apreciar claramente na LOMCE: desde os ataques ás linguas propias até o relevante papel que se lle confire no ensino á igrexa católica, favorecendo ademais aos sectores económicos máis poderosos e acomentendo un proceso de recentralización sen precedentes nos últimos 30 anos.
As mobilizacións previstas na provincia de lugo son:

LUGO
20:00h
Praza Armañá
BURELA
20:00h
Praza da Mariña
MONFORTE
19:30h
Praza de España


O BNG de Lugo Sul comeza unha campaña para explicar as novas taxas xudiciais


O goberno do PP vén de aprobar a lei pola que se establecen taxas para o acceso á xustiza: agora quen non teña cartos non poderá defender os seus dereitos.

Os deputados e senadores do PP, en vez de protexer os intereses das persoas ás que representan, veñen de votar a favor desa lei, que promove que só os máis ricos podan defender os seus dereitos e intereses.

O BNG da comarca de Lugo Sur ven de comenzar unha campaña de información a respecto desta nova inxustiza.


O medio rural galego ergue a voz en Bruxelas


Unha delegación de trinta persoas reúnese no Parlamento europeo con representantes da Comisión para lles trasladar as súas propostas e intereses fronte á reforma da Política Agraria Común para 2014-2020. Gandeir@s, agricultor@s, representantes do sector vitivinícola e académic@s, participan durante dous días nun seminario organizado pola eurodeputada nacionalista, Ana Miranda
Propón a creación dun fondo lácteo ante unha eventual supresión do sistema de cotas
Defende a continuidade dos dereitos de plantación de viñedos por calidade e capacidade de xerar emprego

O sector agrario galego reclamou ante as institucións comunitarias, – Comisión e Parlamento Europeo-, un trato xusto na futura Política Agraria Común (PAC) que marcará as regras de xogo durante o período 2014-2020, nunha xornadas de debate organizadas polo BNG na Eurocámara, nun momento decisivo da negociación da reforma.
“O obxectivo desta xornada é darlle voz directa ao sector para que presente as súas demandas ante os principais interlocutores que interveñen na elaboración da reforma, é dicir Comisión e Parlamento europeo, aos que trasladaron cal é a posición galega e cales son os aspectos que máis preocupan ao sector”, explicou a eurodeputada nacionalista, Ana Miranda.
Entre estas prioridades: creación dun “fondo lácteo” ante unha eventual supresión do actual sistema de cotas, continuar cos dereitos históricos de plantación de viñedos e un reparto máis equitativo das axudas que non poden estar ligadas ao número de hectáreas da explotación.
“O obxectivo desta xornada é darlle voz directa ao sector para que presente as súas demandas ante os principais interlocutores que interveñen na elaboración da reforma”
Galiza, segundo Edelmiro López Iglesias, profesor da USC experto na PAC, reclama “estabilidade de prezos para o sector produtor, que non pode estar como nunha montaña rusa, teñen que ter garantía de rendas xustas”. Neste sentido, engade, reclamamos a continuidade do sistema de cotas, “non porque nos pareza perfecto” senón porque o sector ten feito un “importante esforzo inversor” que levou a moitas explotacións a endebedarse.
Razón pola que o BNG apoia a creación dun fondo lácteo que compense aos produtores galegos en caso de desaparición do sistema en 2015, “que permita ao sector leiteiro galego saír desde o mesmo punto de partida na carreira se hai unha liberalización da produción”, argumenta.
Sector vitivinícola
En nome do sector vitivinícola, Guillerme Rodríguez, presidente da adega Condes de Albarei, expuxo ante a Comisión Europea dúas demandas: continuar cos dereitos de plantación e axudas á comercialización exterior. “Eliminar eses dereitos e permitir que as multinacionais entren a producir sen ningún control implicará pechar o medio de vida de moitas familias”, advertiu.
Entre os integrantes da delegación, responsables de grupos de desenvolvemento rural, expertos académicos en temas agrarios, representantes do sector vitivinícola, de sindicatos agrarios, responsables da organización galega de montes en mancomún, responsables do centro de investigacións agrarias de Mabegondo, asociacións agrarias e cooperativas, comunidade de regantes, gandeiros e produtores.
Igualmente, o grupo ven acompañado pola deputada nacionalista portavoz de agricultura no Parlamento galego, Tereixa Paz, e pola deputada no Congreso Olaia Fernández Davila.
Nestas xornadas ante as institucións comunitarias, a delegación galega mantivo encontros cos responsables da Comisión de Agricultura da UE para os sectores leiteiro, vitivinícola, desenvolvemento rural e axudas da PAC. Conclúen hoxe cunha reunión co director xeral de Agricultura da Comisión Europea, José Manuel Silva, e co eurodeputado e ex ministro de agricultura de Portugal Luís Manuel Capoulas, autor dos informes do Parlamento Europeo sobre as axudas directas e o FEADER, documentos clave dentro da reforma da PAC.

#proponconnosco

.


Construíndo futuro

imaxe
Este documento nace como síntese da primeira rolda de debate interno realizada pola militancia do BNG nas súas Asembleas Comarcais celebradas após as eleccións do 21-O. Este documento está destinado a servir de motor para o debate que o BNG quere agora abrir a toda a base social nacionalista, para compartir a valoración da situación e os retos que afronta a sociedade galega e o proxecto nacionalista nesta grave encrucillada histórica
A apertura deste debate con axenda aberta e coa vontade de abordar en profundidade os retos que temos por diante realízase co convencemento de que este país precisa, hoxe máis que nunca, unha poderosa organización política xenuinamente galega para conquistar a soberanía, erguer unha alternativa á desfeita neoliberal e construír unha sociedade inclusiva, igualitaria e libre. O BNG leva tempo erguendo esa bandeira con valentía máis somos conscientes que os tempos mudan -e nestes anos mudaron con grande celeridade- de xeito que a nosa organización non sempre soubo atinar á hora de trasladar as demandas e sentimentos daquela parte da sociedade á que pretendemos representar e mobilizar para acadar aqueles obxectivos.
As eleccións do 21-O convertéronse para nós nun indicador de que hai aspectos das nosas propostas, da nosa forma de traballar na sociedade e do noso funcionamento interno que deben ser analizadas colectivamente e postas ao día. O obxectivo é manter vivo o vencello político e afectivo coa ampla base social do nacionalismo e a esquerda, para dotármonos dunha forza social suficientemente ampla que nos permita confrontar o centralismo abafante, camiñar cara a soberanía e defender os intereses desa maioría social triturada polo neoliberalismo e, polo tanto, do país enteiro. Nós somos parte activa desa maioría inqueda e transformadora coa que queremos compartir o noso proxecto nacional. Tanto no día a día, no traballo e na vida social como na loita política e na xestión dos asuntos colectivos e públicos.
Buscar o acerto nas propostas e recuperar a ilusión, os afectos e o espírito de traballo mancomunado son os motivos que impulsan estre proceso de debate que agora abrimos coa cidadanía nacionalista, un debate que culminará nunha Asemblea Nacional extraordinaria que se celebrará nos vindeiros meses.

Apoio do BNG ás mobilizacións dun sector lácteo a piques de ser “desafiuzado”

O portavoz nacional do BNG, Guillerme Vázquez, a portavoz de Medio Rural no Parlamento, Tereixa Paz e o tenente de alcalde de Silleda e portavoz do BNG, Matías da Torre, expuxeron esta mañá en rolda de prensa o posicionamento do BNG sobre a situación do sector lácteo galego que, tal e como apuntou Guillerme, “está sendo xibarizado”.


Para enfrontar esta situación o BNG ten rexistrado iniciativas no Parlamento Galego e nos concellos do país afectados por esta situación.
O BNG amosou o seu apoio ás mobilizacións convocadas polos gandeiros o vindeiro 27 de outubro cunha folga de entrega de leite e esixiu por boca do seu portavoz nacional que o goberno galego tome as rendas nesta situación, ao tempo que acusou a Feijóo de “abandonar o sector lácteo aos pés dos cabalos”.
Guillerme Vázquez esixiu “igualdade de condidións e capacidade de decisión para Galiza” ante unha situación que describiron como “insostíbel”.
“Temos o mesmo dereito que Dinamarca ou Holanda a producir” afirmou Guillerme.
Pola súa banda, a deputada Tereixa Paz explicou o contido das iniciativas rexistradas polo BNG no Parlamento Galego para instar ao goberno a que “asuma a responsabilidade de liderar o sector lácteo e que impulse novas medidas como a creación dunha interprofesional, impulsar un marco galego de relación entre os operadores do sector lácteo”.
Tamén lembrou que dos 400 expedientes existentes no Banco de Terras non saiu ningún contrato, polo que non se lles está a proporcionar aos gandeiros a base territorial que precisan.
Perda do 43% do poder adquisitivo
Pola súa banda, Matías Da Torre describiu a situación “agónica” da comarca do Deza, con 12 concellos cunha poboación de 75.000 persoas das que 12.000 traballan no sector agrogandeiro nas máis de 2.000 explotacións existentes.
Afirmou que “o sector é a columna vertebral da comarca” e asegurou que nos últimos 5 ou 6 anos o sector leiteiro perdeu o 43% do poder adquisitivo cuns custes que se disparan e uns beneficios que só subiron o 1%.
“Os gandeiros están totalmente endebedados e o grande desafiuzamento do sector lácteo está por chegar agora se non se toman as rendas da situación”, afirmou Matías da Torre.
O portavoz municipal do BNG en Silleda aclarou que esta situación “non ten parangón en todo o Estado nin na Unión Europea e debemos porlle solución porque non é casual que pase aquí”.

Presentacións 22 documentos do feminismo galego en Monforte


Desde a Asociación Galega da Muller ata a Marcha Mundial das Mulleres, de 1975 a 2003,  o libro deixa constancia das principais campañas impulsadas no noso País polo movemento social a prol dos dereitos das mulleres, cunha énfase especial nos anos da súa construción nas décadas 70 e 80. Os documentos agrúpanse en diferentes apartados contemplándose, en primeiro lugar, o empeño de ruptura co rol tradicionalmente asignado ás mulleres para abordar despois outros ámbitos do esforzo emancipador do feminismo: a sexualidade, o traballo dentro e fóra da casa, a necesaria independencia das mulleres ou a súa actuación cara á esfera política. Canda o esforzo divulgativo, a edición persegue "convencer as súas lectoras e lectores –tanto ou máis necesarios– de que os avances do feminismo o son da sociedade toda polo que paga a pena implicarse en defendelo e espallalo, especialmente cando se pode comprobar acotío o poder das forzas que teiman polo seu retroceso. Non hai dereitos eternos... e, lamentablemente, vivimos días nos que unha crúa realidade se encarga de deixárnolo ben patente".

Xoves 22 de Novembro | 20h Casa da Cultura Monforte
Isabel Rodríguez Mate. Historiadora e investigadora
Xabier Macias. Director da Fundación Galiza Sempre

Solidariedade co Pobo Palestino


1.-O Bloque Nacionalista Galego quer expresar a súa máis enérxica condena perante a operación de  limpeza étnica que o Estado de Israel está a perpetrar contra o pobo palestino na Franxa de Gaza.Queremos denunciar as prácticas de terrorismo de Estado de Israel contra a poboación civil desarmada, que xa se ten traducido na morte de moitas crianzas palestinas.

2.-Condenamos tamén a cumplicidade colaboracionista con estes monstrosos crimes por parte dos Gobernos do Estado Español, da Unión Europea e dos Estados Unidos.
Sen o amparo da Unión Europea e moi nomeadamente dos Estados Unidos non sería posíbel que Israel violase permanentemente a legalidade internacional, os dereitos humanos do pobo palestino e incumprise impunemente as resolucións de Nacións Unidas.
Non perdamos de vista que Israel actúa en Oriente Próximo como un peón da política imperialista dos Estados Unidos.

3.-O Bloque Nacionalista Galego insta ao Goberno español a que cese na súa política colaboracionista con Israel e a que se poña do lado do respeito da legalidade internacional.
O Bloque Nacionalista Galego empraza ao Goberno a que defenda no seo da Unión Europea a denuncia do Acordo de Asociación entre a UE e Israel mentres este Estado non poña fin aos seus ataques  terroristas.
O Acordo de Asociación entre a UE e Israel debe suspenderse até que o Estado hebreo cumpra coas  resolucións de Nacións Unidas e, portanto, abandone os territorios que ocupa de forma ilegal desde  1967.

4.-A restauración da xustiza e do respeito dos dereitos humanos e a legalidade internacional pasa  en Oriente Próximo polo recoñecimento do dereito de autodeterminación do pobo palestino. Deben criarse as condicións que permitan, co necesario desarme do terrorista Estado de Israel, que  Palestina se dote dun Estado propio economica e territorialmente viábel. Esta é unha causa non só do pobo palestino, senón de todos os pobos que, como o galego, aspiran á  xustiza e á liberdade.
As bombas que caen sobre o pobo palestino caen tamén sobre todos os pacifistas, sobre todos os  demócratas, sobre todos os anti-imperialistas. Caen sobre todos e todas nós.

Mais tede por seguro que a loita do pobo palestino non será baldía.
Lembremos aquí o que dicía Mahatma Gandhi: 
"Ten habido tiranos, ten habido asasinos, e por un tempo poden  parecer invencíbeis, pero ao final, sempre caen".


Viva o pobo palestino! 
Palestina Vencerá!

O BNG fará unha oposición firme e contundente e pide respecto ao pluralismo


O portavoz do GP do BNG, Francisco Jorquera, anunciou que esta formación política fará unha oposición firme, contundente e propositiva, co obxecto de revitalizar o Parlamento como eixo central da vida política.
“Trátase –dixo- de recuperar o Parlamento para que sexa a voz dos cidadáns e de que reflicta, por tanto, o seu pluralismo, que reflicta o mandato das urnas, que rachou coa preponderancia do bipartidismo, por iso PP e PSOE non deben caer na tentación de ir a unha conformación a dous dos distintos organismos da Cámara”.
Interrelación coa base da sociedade
Para Jorquera, é fundamental levar a voz dos cidadáns ao Parlamento e o Parlamento á rúa e iso pasa polo respecto escrupuloso ao pluralismo e tamén por un traballo de interrelación permanente do traballo parlamentar coa base da sociedade.
“A nosa oposición firme imos acompañala de propostas alternativas e claras que demostren que é falso que, tal e como sostén o PP, sexa imposíbel marcar un cambio de rumbo en Galiza e implementar outras políticas”.
Aymerich, viceportavoz
A este respecto, Carlos Aymerich, que execerá de viceportavoz do grupo, explicou que o BNG traballará tanto no inmediato, para resolver os problemas máis urxentes do cidadáns, víctimas dunha situación social e económica catastrófica, como no estructural, con reformas máis de fondo que pasan por garantir a capacidade de Galiza para decidir.
Aymerich referiuse, por exemplo, á necesidade urxente da moratoria sobre os desafiuzamentos pero tamén a que é preciso pór en marcha outra política de vivenda; asemade, falou de pór freo aos Eres e garantir a protección social para os desempregados no inmediato, mais tamén cómpre un novo marco galego de relacións laborais e apostou por traballar xa contra a privatización dos hospitais pero co horizonte posto en revisar o sistema de financiamento e en poder mudar as prioridades orzamentarias.
Reparto de áreas de traballo
O grupo parlamentar do BNG celebrou hoxe a súa primeira reunión, na que se ratificou a decisión da Executiva de nomear a Francisco Jorquera como portavoz e a Carlos Aymerich e Ana Pontón como viceportavoces.
Sobre a distribución do traballo dos distintos deputados e deputadas, Ana Pontón informou de que fica do seguinte xeito:
Cosme Pombo: Educación e Universidade e Vivenda
Tereixa Paz: Medio Rural e Administración e Xustiza
Ana Pontón: Cultura e Lingua, Ordenación do Territorio e Vivenda
Carlos Aymerich: Facenda e Sanidade
Carme Adán: Industria, Igualdade e Servizos Sociais
Montse Prado: Pesca, Emprego e Comercio
Francisco Jorquera: Democracia e distintos asuntos económicos

O BNG chama á rebelión da cidadanía ante a folga xeral do 14-N


O portavoz nacional do BNG, Guillerme Vázquez, e o secretario xeral da CIG, Suso Seixo, ofreceron unha rolda de prensa despois de manter un encontro no que analizaron a situación fronte á convocatoria de folga xeral do vindeiro 14 de novembro.
O líder do BNG afirmou de xeito rotundo que, ante a crise e as súas consecuencias podemos dicir “que nada paga a pena, ou saírmos da resignación, levantarnos e tentar cambiar o rumbo desta situación a todas luces desastrosa”.
Guillerme lembrou que “pola vía da resignación non hai saída para ninguén” e, parafraseando as afirmacións atribuídas a Bertol Bretch asegurou que “virán tamén a por cada un de nós”, polo que animou á poboación a rebelarse e secundar a folga, “facer frente a esta política que continúa a facer o PP”.
Pola súa banda, o secretario xeral da CIG, Suso Seixo, referiuse de xeito máis específico á situación laboral pola que pasan milleiros de persoas no noso país, “consecuencia das sucesivas reformas laborais que tiñan como obxectivo a caída dos salarios e que se traducirá en 2013 nunha caída do consumo”.
Seixo referiuse ás manobras utilizadas dende as empresas para perpetuar a má situación dos seus traballadores e traballadoras agardando a que caduquen os seus convenios para prorrogar os convenios colectivos ante “as dificultades de mobilización social”.
O secretario xeral da CIG denunciou os recortes das liberdades públicas, a precarización das condicións laborais e as políticas de axustes para favorecer que os estados poidan pagar aos bancos e aludiu tamén á mobilización como única vía para termos un “futuro prometedor”.

A CIG convoca á folga xeral o 14 de novembro

O Consello Confederal da CIG vén de ratificar a decisión da Executiva de convocar folga xeral para o 14 de novembro, coincidindo coa data acordada noutros países da periferia europea, como Portugal, e a nivel estatal, con CCOO e UGT. O Consello Confederal reitera a necesidade de continuar coa mobilización social dada a dureza das políticas do PP e do seu carácter “profundamente antisocial e antiobreiro”.


O secretario xeral da CIG, Suso Seixo, explicou que “imos á folga xeral con todas as consecuencias, conscientes de que as políticas que está a adoptar o PP requiren deste tipo de respostas” e lembrou que a central sindical viña reclamando a necesidade desta convocatoria. “Eramos partidarios de que fora xa no mes de setembro, coincidindo coa que se convocaba en Euskadi, para responder ás medidas adoptadas polo goberno durante os meses de verán. Políticas de recorte de dereitos moi duras que nos están a levar a unha situación e a unhas condicións de precariedade e de empobrecemento da poboación intolerábeis”.
Iso non foi posíbel, subliñou, porque a CCOO e UGT non lles parecía a data máis adecuada. Por iso a CIG avaliou esta situación e acordou agardar, xa que, pola súa parte había o compromiso de que se convocaría no mes de novembro a nivel de estado. “Consideramos que a resposta tiña que ser o máis masiva posíbel, porque cantas máis organizacións sindicais participen na convocatoria, máis posibilidades teremos de que a participación sexa, a nivel cuantitativo, máis importante”.
A central sindical valora moi positivamente que CCOO e UGT acordaran sumarse á convocatoria de folga e mesmo sindicatos de países da periferia de Europa, porque “estas medidas veñen decidas desde o BCE e da Comisión Europea e o que está a facer o PP, na medida en que coincide cos seus presupostos ideolóxicos, é levalas adiante con toda a dureza”.
A CIG considera que para 2013 empeorarán aínda máis as condicións laborais e sociais e que se incrementarán as políticas de axuste. “Parécenos máis necesario que nunca continuar con esta dinámica mobilizadora e dar unha resposta con convocatorias de folga xeral as veces que sexa necesario, para parar estas políticas e forzar aos gobernos a facer outras distintas, que garantan que imos saír da crise, pero non de calquera maneira, senón favorecendo os intereses da clase traballadora”, afirma Seixo.
Respecto do impacto que puideran ter os resultados electorais no éxito da convocatoria, o secretario xeral sinala que moitos galegos e galegas “aspirabamos a que o PP perdera a maioría absoluta na Xunta de Galiza e estou convencido de que moitos e moitas entendiamos que o PP o único que está facendo é servir de correa de transmisión do que marca o BCE e o vai seguir facendo con dramáticas consecuencias para o noso país”, entre as que sinalou o deterioro do no noso tecido produtivo, da rede de servizos sociais e mesmo a marcha que se está a producir de mozas e mozos a outras partes de Europa. “Mozos e mozas cunha formación profesional e académica importante que tiñan que estar aportando todo ese coñecemento ao desenvolvemento económico e social do noso país”.
Malia recoñecer o estado xeralizado de decepción ante a revalidación da maioría absoluta, Seixo subliñou que, en todo caso, os apoios que ten o PP andan arredor do 25% da poboación galega, polo que considerou que “non  pode facer o que lle dea a gana”.
Xunto a isto lembrou a perda de miles de votos e o feito de que alí onde se lle deu unha maior contestación ás políticas do PP, nas cidades e nas grandes vilas, esa perda de apoios foi aínda maior. “Quere dicir que a política de contestación social que se está a facer si está a incidir en certos sectores e na perda de votos, cando menos nos sectores máis conscientes da sociedade galega”. Por iso, convidou a seguir mobilizándose para tratar de chegar ao resto das galegas e galegos “moi influenciados polos medios de comunicación, polo enorme poder institucional e caciquil, para dicirlles que aquí votar ao PP é un suicidio para o noso pobo, que levará a Galiza a unha calella sen saída, ao empobrecemento das clases populares e a perda de dereitos laborais e sociais”.

O BNG denuncia que o centro de saúde de Escairón aínda non acendeu a calefacción


A asemblea local do BNG do Saviñao acusou ao goberno municipal de deixamento no mantemento dos edificios e especialmente do centro de saúde de Escairón, no que segundo os nacionalistas aínda non se acendeu a calefacción. A pesar do frío que se rexistrou estes días na zona -precisan-, o centro «ten o depósito do gasoil para a calefacción baleiro».
O BNG sinala doutra banda que, segundo os empregados do referido centro, o pasado día 16 xa se pediu ao Concello que enchese o depósito para poder pór en marcha a calefacción, sen que ata onte se tomase esa medida. «Non pode ser que case non mes de novembro non haxa calefacción nun centro médico onde vos nenos e vos maiores enfermos teñen que espirse para pasar consulta», di a este respecto o BNG, que urxe ademais ao Concello a solucionar este problema.
Aínda que a xestión dos centros de saúde corresponde ao Sergas, os concellos teñen a obriga de ocuparse do mantemento da calefacción e da limpeza destes edificios públicos, para o que deben investir os seus propios fondos

Resultados electorais O Saviñao

Censo 3.807 100,00%
Total Votantes 2.637 69,27%
Votos a candidaturas 2.528 97,98%
Votos en branco 52 2,02%
Votos nulos 57 2,16%
bng psoe pp age blanco nulos outros
escairon a 33 81 281 28 13 14 7
escairon b 44 90 218 28 8 9 9
piñeiró 16 33 90 10 1 11 1
vilelos 18 41 103 15 4 4 8
currelos 15 77 157 28 4 5 3
chave 22 50 144 7 4 2 1
segan 23 33 99 6 3 1 2
fion 8 52 113 8 8 2
diomondi 15 60 190 6 3 1
aiaz 14 27 190 7 4 1
TOTAL 208 544 1585 143 52 49 32



A mocidade decide. Rebótate e vota BNG!


Como saberás, o vindeiro 21 de outubro celébranse Eleccións Galegas. Alberto Núñez Feijóo viuse obrigado a adiantar as eleccións polos intereses electoralistas do PP. Preferiron convocar, antes de anunciar os brutais recortes contra a maioría da poboación que lle supoñan perder a maioría. Non podemos permitir que sigan a gobernar os mesmos que nos rouban o noso futuro, condenándonos ao desemprego e ameazándonos con máis recortes, mentres favorecen a banqueiros e especuladores. É a hora de contestarlles co noso voto.
Temos que botar fóra o goberno que expulsou 60.000 moz@s galeg@s á emigración, que nos condena a máis dun 40% de desemprego xuvenil en Galiza, que sobe as taxas universitarias, que recorta as axudas ao estudo e 2.500 profesor@s, que pretende volvernos ao pasado penalizando o aborto, que considera accesoria a prevención de accidentes e suprimiu o Noitebús e que manipula e mente nos medios de comunicación para perpetuarse no poder.
Desde Galiza Nova, organización xuvenil do BNG, cremos que é o momento de apostar por un cambio de goberno que supoña un cambio real de políticas. Precisamos un goberno que poña a Galiza a producir, desenvolvendo a nosa capacidade económica para xerar emprego de calidade. Temos dereito a traballar na nosa terra. Precisamos un goberno insubmiso aos recortes, que blinde os servizos públicos. Precisamos  ter soberanía para poder decidir, para que exista democracia real, para gobernar nós a nosa terra.
Non deixes que decidan por ti o futuro de Galiza. O vindeiro 21 de outubro participa destas Eleccións e dálle máis forza ao BNG. Rebótate! Vota BNG

Cinco ideas, un proxecto de país


1. INSUBMISIÓN AOS RECORTES E BANCA PÚBLICA: Gobernemos nós o noso aforro. O proxecto do BNG é conseguir un Banco público vinculado coa transferencia de NGB a Galiza. A opción do PP é liquidar NGB despois de ter investido millóns de euros públicos, o BNG non consentirá ningún recorte mentres se lle regalan cartos á banca privada. O BNG será insumiso e presentará recursos de inconstitucionalidade contra as decisións de Madrid que invadan competencias para obrigar a novos recortes. Gobernemos nós o noso aforro como garantía de que os autónomos, os pequenos e medianos empresarios e as familias teñan acceso ao crédito e que os seus proxectos servan para xerar riqueza e emprego que non saia de Galiza.
2. UN SISTEMA IMPOSITIVO MÁIS XUSTO: Gobernemos nós a nosa fiscalidade, os nosos impostos. O proxecto de BNG incorpora unha Reforma fiscal para gravar as grandes fortunas e un novo Concerto Económico para que os beneficios das grandes empresas como Inditex ou Citroen paguen o seu imposto de sociedades en Galiza. A opción do PP é cargar de impostos aos que menos teñen, o IVA é só un exemplo, que paga igual un obreiro e un banqueiro.
3. PÓR GALIZA A PRODUCIR PARA XERAR EMPREGO: Gobernemos nós os nosos recursos porque Galiza é un país rico, temos o naval máis punteiro, somos potencia pesqueira, temos o mellor agro e un grande potencial en I+ D. O proxecto do BNG pasa porque Galiza teña presenza propia en Bruxelas para defendelos. A opción do PP é supeditar calquera decisión sobre os nosos sectores productivos aos intereses de Madrid e Bruxelas. Tamén gobernemos nós a nosa enerxía, o proxecto do BNG inclúe unha tarifa eléctrica galega en beneficio dos consumidores.
4. SERVIZOS PÚBLICOS E XUSTIZA SOCIAL: Gobernemos nós a nosa sanidade, o ensino e o benestar. Sanidade e ensino público galego como dereitos. Renda mínima digna para todos e todas os que carezan de ingresos vinculada á formación e á integración. O proxecto do BNG quere xustiza social, non pode seguir habendo xente sen casa e casas sen xente. Establecerase un Patrimonio público de vivenda coas casas baleiras en mans dos bancos. O proxecto do BNG quere que ninguén fique atrás. Esa é a nosa alternativa. A do PP é un banco malo, é facer negocio no público.
5. MÁIS DEMOCRACIA: NIN UN PASO ATRÁS NOS DEREITOS E AS LIBERDADES: O autogoberno como garantía de dereitos e liberdades. Para poder legar unha lingua, unha cultura con manifestación diversas e plurais, un espazo de recoñecemento das diferenzas en igualdade de oportunidades, non podemos consentir o esnaquizamento de dereitos conseguidos polas xeracións que nos precederon. O proxecto de país do BNG non permitirá recortar en igualdade e soberanía e será un proxecto aberto e construido entre todos, por iso propomos unha Lei de Consultas Populares. Máis soberanía, máis capacidade para gobernar nós a nosa terra é maior benestar.

Guillerme: “As eleccións están abertas, e se sobe o BNG Feijóo perderá”


O portavoz nacional do BNG, Guillerme Vázquez, amosouse convencido de que “o 21 de outubro vai haber un cambio de rumbo en Galiza, porque somos moitos máis os que rexeitamos as políticas de Feijóo”. Para iso, subliñou que “a chave da derrota do PP está no ascenso eleitoral do BNG”.
“A esperanza do BNG fronte á desesperanza de Feijóo”
Previamente, o portavoz nacional salientou que “o 21 de outubro temos que elixir entre a desesperanza que representa o PP e Feijóo ou decidir a esperanza e o cambio de rumbo que representa o BNG”.
Asegurou que “o BNG está disposto a dar a batalla para facer realidade unha aspiración fundamental: o dereito a vivir e traballar na Galiza con dignidade”.
Guillerme precisou que “a estas alturas está claro que ou ben optamos por máis Feijóo, que é o mesmo que máis Rajoy e máis recortes e centralismo, máis desastre económico e social, ou apostar por un cambio de rumbo que representa o BNG”.
Neste sentido, afirmou que “no BNG estamos convencidos de que somos moitos e moitas máis os galegos e galegas que queremos un cambio de rumbo e por iso o día 21 estou seguro de que ese cambio de rumbo vaise producir”.
“O partido está aberto, as eleccións non están decididas”, subliñou.
A este respeito, salientou que “a chave da derrota do PP é o ascenso electoral do BNG, e por iso pedimos a todos os galegos e galegas que reflexionen, pensen e voten BNG”.

O PP está nervoso e por iso opta polo xogo suxo e viola reiteradamente a lei electoral


O candidato do BNG á presidencia da Xunta, Francisco Jorquera, asegurou que Feijóo está nervoso e por iso xoga suxo, até o punto de ter violado nove veces a lei electoral.
Jorquera, nun multitudinario mitin en Monforte, ironizou coas declaracións de Feijóo nas que facía un chamamento ao resto dos partidos a facer unha campaña limpa, “cando quere emporcar o terreo e confundir co argumento de que todos os políticos son iguais”.
Neste sentido, o candidato nacionalista afirmou que está convencido de que Feijóo está disposto a todo para que o desexo de cambio que se percibe na rúa non se plasme nas urnas.
“Incluso se o precisa -engadiu- é capaz de volver a regalarnos esta semana outra operación espectáculo como ás que nos ten acostumados cando se achega un período electoral”.
Para Jorquera, Feijóo sabe que de se concentrar o voto nacionalista e de esquerdas no BNG, terá que abandonar Monte Pío e o País abrirá unha nova etapaa política, de esperanza, “o cambio real que protagonizará o BNG”.
O candidato nacionalista defendeu a necesidade deste cambio real frente a un goberno de Feijóo que no pode vender solvencia, porque solvencia é resolver os problemas máis acuciantes que ten o País e non mentir, “como fai Feijóo, que é un presidente insensíbel e tramposo”.
Jorquera reiterou que estas eleccións teñen tamén unha vertente estatal, porque votar a Feijóo é dar un cheque en branco a Rajoy para que poida seguir aplicando recortes, “malia que estes días Rajoy ande por Galiza facendo campaña e evite a foto con Feijóo”.

Para o candidato do BNG, por iso o PP ten tanto interese en facer unha “campaña do medo”, para poder seguir aplicando recortes e favorecer a banca en detrimento das clases traballadoras.
“O PP di que ou maioría absoluta ou o caos e vós sabedes ben o que implican as maiorías absolutas do PP en Madrid e en Galiza, que o PP sexa impune para poder facer todo o contrario ao que promete en campaña e para traizoar aos seus propios votantes”.
Neste sentido, Jorquera fixo un chamamento a aqueles sectores tradicionalmente votantes do PP para que non teñan medo e se sumen ao cambio que representa o BNG, como garantía, no caso concreto de Monforte, de manter a área sanitaria integral e impulsar o Hospital de Monforte.
Cosme Pombo
Pola súa parte, o cabeza de lista por Lugo, Cosme Pombo, acusou a Feijóo de ter unha folla en braca como balance de xestión estes tres anos e medio e reivindicou o dereito de Galiza a poder producir.
A este respecto, fixo especial fincapé no sector vitivinícola, na necesidade dunha Lei Galega do Viño, e defendeu a creazón dunha banca pública como ferramenta que tamén pode axudar a xerar emprego.

Jorquera pide á mocidade un “voto rebelde para unha forza política insumisa cos recortes”



Francisco Jorquera acudiu esta mañá á manifestación convocada polos Comités de Estudantes e Galiza Nova en defensa dun ensino público e de calidade. Alí apelou á mocidade par que “a súa rebeldía se traduza nun voto rebelde, por unha forza política que vai ser insumisa cos recortes, que vai facer do ensino público unha prioridade e que vai plantar cara aos recortes, o BNG”.
O candidato nacionalista afirmou que “recortar no ensino é o mesmo que recortar no futuro dun país, na formación da mocidade, o mesmo que ofrecer á mocidade como futuro unha maleta para que se gañe a vida despachando copas en Londres”.
En opinión de Jorquera “o que acontece obedece a un deseño, unha aposta do PP para que exista un ensino para ricos e outro para pobres porque mentres se recorta no ensino público os centros privados benefícianse dos programas para mellora da calidade educativa ou o goberno Feijóo subvenciona centros de ensino que separan nenos e nenas”.
Fronte a estas políticas, Jorquera defendeu as do BNG que apostan “desenvolver e dotar de máis calidade o ensino público para formar a mocidade e que poida vivir e traballar dignamente de Galiza e modificar o modelo de crecemento que nos levou a esta crise”.

Nunca Máis chama a participar da concentración do día 16 "para que os culpábeis non saian impunes"

A plataforma lembra que “a seguridade das costas galegas segue a ser competencia de Madrid”, que “outro 'Prestige' é posíbel” e chama a concentrarse na Coruña o 16 no inicio dun xuízo que “comeza dez anos após a catástrofe”. 

Cos artistas Xurxo Souto e Isabel Risco como portavoces, a plataforma cidadá Nunca Máis volveu esta cuarta feira na Coruña a comparecer en público para, nas vésperas do décimo aniversario da catástrofe do 'Prestige', chamar a participar na concentración que convocan diante do improvisado xulgado de ExpoCoruña onde o día 16 comeza o xuízo, ás 11.00 horas. “Volvemos a rúa porque outro desastre como aquel é posíbel. Houbo avances, como a desaparición dos petroleiros monocasco, mais segue sen haber unha vixilancia vía satélite que controle o que pasa no noso corredor marítimo e, por exemplo, evite verquidos como os dos sentinazos. E aínda non se transferiron a Galiza as competencias nese eido, polo que Madrid volvería ser quen asumise outra situación semellante. Tampouco hai estudios que indiquen ás claras o estado dos bancos afectados ou do efecto que tivo o chapapote na saúde das persoas”, indicou Souto, que comezou a conferencia de prensa pedindo: “Saúde e océano”.
O polifacético artista coruñés asegurou que “o xuízo comezará dez anos despois, e todo adiamento na xustiza é sempre unha derrota”. “Mais temos que celebrar que diante do aparato xudicial do estado, os avogados de Nunca Máis teimaron sen descanso e até conseguiron que fose imputado o Director Xeral da Mariña Mercante naquela altura, López Sors. Agora o que ten que quedar claro é que non pode haber impunidade”, engadiu. Xurxo Souto tamén indicou que “o feito de que o 'señor de los hilillos' (en referencia a Mariano Rajoy) sexa agora presidente do goberno é unha razón máis para nos mobilizar, xa que está moi claro que as nefastas mans en que estivemos daquela son as mesmas en que estamos agora, por moita lexitimidade que teñan. De feito, é importante a reactivación de Nunca Máis tamén polo que significa nestes tempos de crise en que nos piden que aturemos todo de xeonllos. Nese sentido, Nunca Máis foi un exemplo para o mundo á hora de levantar a bandeira da dignidade dun pobo e do ecoloxismo, ademais cun xeito propio de mobilizarse, creativo e mesmo humorístico”.
Abordado polas previsíbeis acusacións de “electoralismo” que puidese ter esta convocatoria, Xurxo Souto lembrou que “a data do xuízo foi cousa do xuíz e dos que tardaron tanto, non a puxemos nós”. Pola súa banda, a actriz Isabel Risco tamén fixo referencia a que “moitos dos culpábeis da terríbel xestión da catástrofe agora ocupan cargos aínda máis altos que hai dez anos”. Así mesmo, asegurou que “os cativos avances acadados en seguridade marítima debéronse á mobilización deste pobo” e afirmou que a presente convocatoria tamén pretende lembrar que “nós somos do mar, o mar non é noso”. 
Os avogados denuncian a tardanza do proceso
Pola súa banda, os avogados da plataforma Miguel Anxo Fernández e Pedro Trepat acusaron o estado de “dilación indebida” perante os dez anos de adiamento da causa. Tamén celebraron que vaia comparecer o daquela ministro de Fomento e alto cargo do PP, Álvarez Cascos, “posto que intentaron usar a López Sors como dique con que poñer a salvo o resto de responsábeis do goberno”.
Fernández asegurou que as conversas desveladas na prensa segundo as cales Salvamento Marítimo intentou levar o buque á ría da Coruña para non danar toda a costa galega servirán de “atenuante”, entrementres Trepat dixo que “agora mesmo pode volver producirse un accidente como aquel, mais creo que a resposta popular conseguiu que nese caso agora farían caso aos técnicos á hora de tomar decisións”.
A confraría denuncia que persiste a falta de medios
Entre os asistentes á conferencia de prensa estivo o patrón maior da confraría da Coruña, Manuel Cao, que sinalou que a ría da Coruña “non era o lugar máis axeitado para levar o Prestige”. En conversa informal ao remate do acto, lembrouse que a maioría de expertos apostaron por levar o 'Prestige' a Corcubión, que polas súas especiais características até podía ter evitado o afundimento do barco.
Cao confirmou que “os medios existentes agora para unha emerxencia como aquela seguen a ser escasos, case ningún”. Ademais, en contra dos argumentos utilizados no seu día polos gobernantes “o porto exterior da Coruña non pode ser un porto refuxio de ningunha das maneiras, aí non se pode meter un barco nesa situación, especialmente nos meses de inverno”

A CIG chama á mobilización a prol dos servizos públicos

Manifestacións, o luns 15 en todas as cidades, en defensa dos servizos públicos e contra as políticas antisociais do PP 



 A Plataforma Galega en Defensa dos Servizos Públicos, da que forma parte a Área Pública da CIG (CIG-Ensino, CIG-Administración e CIG-Saúde) fixo  un chamamento a participar nas manifestacións convocadas en todas as comarcas para manifestar o rexeitamento ás políticas antisociais e regresivas que vén aplicando o PP, tanto para os servizos públicos, en xeral, como para a destrución de emprego público en particular. Medidas que constitúen un ataque sen precedentes aos dereitos individuais e colectivos das galegas e galegos, pero tamén das empregadas e empregados das distintas administracións públicas.

As horas e lugares de saída das manifestacións previstas son:
A Coruña : Praza de Pontevedra- 19:00 h
Compostela: Alameda- 19:00 h
Ferrol : Praza de España – 19:00 h
Lugo: Edificio Admtvo Xunta- 19:00 h
Ourense: Pavillón dos Remedios- 19:00 h
Pontevedra: Praza da Ferrería -20:00 h
Vigo: Vía Norte- 20:00 h

Acto Público do BNG en Escairón

A asamblea local do BNG do Saviñao ten o pracer de convidar a todos os veciños e veciñas do Saviñao ao acto público que se celebrará o vindeiro sábado 13 de outubro ás 20:30h no Auditorio Municipal de Escairón.
Contaremos coa presenza dos candidatos Cosme Pombo e Maribel Sánchez.

Para facerlles frente, gobernemos nós a nosa terra!



Chegaron as eleicións. E, coma cada vez que hai cita coas urnas, as comparecencias dividiranse en balances e promesas. Presumen no Partido Popular de que son moi austeros nesta época de crise, de que somos a autonomía que menos gasta, a que cumple o déficit..

Pero os vecinos e as veciñas do Saviñao coñecemos a realidade que nos toca vivir, nós sufrimos tres gobernos do Partido Popular: o municipal, o autonómico e o estatal.

Coñecemos ben as políticas que aplican: aumentaron os impostos, baixáronlle o soldo aos traballadores públicos, aumentaron as retencións do IRPF, agora temos que pagar os medicamentos, os libros de texto, aumentaron o recibo da auga, o prezo da gardería, o recibo da contribución, etc, esos son os recortes para o pobo, porque no Saviñao duplicáronse as decicacións exclusivas e agora 4 concelleiros do PP cobran do Concello. Esa é a súa austeridade!

En tres anos e medio Feijoo fixo retroceder a Galiza 10 anos, agora Galiza ten menos benestar, menos democracia e menos autogoberno. O goberno de Feijoo foi o goberno do paro e dos recortes sociais.

O BNG é unha forza sólida e solvente, con capacidade demostrada na defensa de Galiza e de políticas de esquerda tanto nas institucións como na rúa.

Galiza precisa un proxecto nacional para reorientar as súas políticas: hai que por a Galiza a producir, protexer os servizos públicos e avanzar en democracia e soberanía.


Votar ao PP é lexetimar os seus plans: máis recortes para os máis débiles.

O 21 de outubro é o momento de plantarlles cara a estas políticas inxustas, é o momento de cambiar as cousas. O 21 de outubro VOTA BNG. EN BLOQUE PODEMOS!

Cosme Pombo chama a “concentrar o voto nacionalista e de esquerdas no BNG”


O Bloque Nacionalista Galego abríu  a campaña en Lugo das eleccións galegas do día 21 cun chamamento a “concentrar no BNG todo o voto nacionalista e de esquerdas” para “botar” ao PP da Xunta. O cabeza de lista pola provincia de Lugo, Cosme Pombo, dixo que “Feijóo non exerce de presidente de Galiza, porque non é a voz do pobo galego, senón a voz de Rajoy”.
O candidato nacionalista dixo que “é posible botar ao peor presidente da historia de Galiza, que leva tres anos sen facer nada por este país” e afirmou que “para iso a chave pasa por concentrar todo o voto nacionalista e de esquerdas no BNG”. “Se isto ocorre -dixo- o PP ten as eleccións perdidas”.
Na praza da Soidade da capital lucense e acompañado por membros da candidatura, militantes e cargos orgánicos e institucionais do BNG, Cosme Pombo acusou a Feijóo de ser “un mandado de Rajoy”. “Feijóo agocha o programa de recortes masivos que ten preparados os seu xefe Rajoy para despois das eleccións, cando pida o rescate”, denunciou. “Non é de fiar un candidato que agocha mesmo as siglas do seu propio partido, como fai Feijóo, para ver se así despista á xente e non o relacionan cos recortes do PP”, criticou o candidato nacionalista.
O PP reprime a voz dos cidadáns
No acto Cosme Pombo tamén alertou da “actitude dictatorial e antidemocrática do PP, que tentou reprimir a voz dos cidadáns, denunciando a manifestación desta tarde para que non se producira, igual que reprimíu as manifestacións pacíficas de cidadáns diante do Congreso dos Deputados a semana pasada”. Finalmente a Xunta Electoral non deu a razón ao PP e a manifestación convocada pola CIG percorreu as rúas de Lugo en protesta polos recortes dos Goberno do PP en Madrid e na Xunta.