EXITO NACIONALISTA NA REDE

A campaña de vídeo viral "Eu son Anxo Quintana" está a ser un éxito sen precedentes. Dende que se lanzou á rede o 16 de xaneiro, en só cinco días superou 25.000 visualizacións, das cales máis de 15.000 foron a través da páxina Quin.TV e as 10.000 restantes foron grazas á difusión que deron os propios internautas a través dos seus blogs, perfís en Facebook e en Youtube, plataformas como Zappinternet ou Milinkito, prensa dixital, ou a canle TeleBNG.

Un bo indicador do seu éxito é que xa foi obxecto de parodias, a favor e en contra, que se poden atopar no Youtube. O vídeo reinterpreta, con moito sentido do humor, unha coñecida escea do filme Spartacus, dirixido por Stanley Kubrick, con Kirk Douglas no papel principal. Foi dirixido por Antón Reixa e nel aparecen actores como Isabel Martínez, Manuel Oliveira, ou José Manuel Rodríguez “Isi”

Máis de 40.000 mulleres se beneficiarán do complemento autonómico do paro

O candidato do BNG á presidencia da Xunta, Anxo Quintana, pechou hoxe en Santiago de Compostela o Acto Nacional da Igualdade do BNG nesta precampaña ao que asistiron máis de 1.300 persoas, na súa inmensa maioría mulleres, procedentes de todos os rincóns de Galiza.
Neste acto, no que participaron tamén as candidatas Carme Adán, Ana Pontón e Teresa Táboas, Quintana detallou algunhas das desigualdades ás que se teñen que enfrontar as mulleres do noso país e que o BNG quer atallar desde o seu labor no goberno.

Nomeadamente, o candidato nacionalista destacou o complemento autonómico para o desemprego que o nacionalismo quer poñer en marcha e que beneficiará a máis de 60.000 persoas en todo o país, “este complemento beneficiará a máis de 42.000 mulleres que precisan un esforzo suplementar, porque as mulleres tamén padecen máis o paro que os homes”.

Asi, Quintana apostou por un Novo Estatuto “que debe ser unha carta de dereitos e deberes e por iso proporemos que figure en el o complemento autonómico das pensións e do paro como unha medida universal que ninguén poderá negar ás mulleres e homes deste país”. Nesta liña lembrou que o salario da liberdade tense establecido “con rango de lei tamén para que non dependera da vontade do goberno de turno”.

O cartel nacionalista amosouse especialmente emocionado neste acto que iniciou lembrando que o nacionalismo “é igualdade entre as persoas, igualdade de dereitos e oportunidades e por iso, cando o BNG chegou ao goberno o primeiro que fixo foi ubicar na vicepresidencia as responsabilidades de igualdade porque queriamos que comprometeran ao conxunto do goberno”. Asi, indicou que “grazas ao labor feito polo BNG, convertimos á Xunta nun dos gobernos europeos máis comprometidos coa igualdade”.

“Precísase feminismo na política e non só presenza de mulleres”

A cabeza de lista do BNG pola provincia de Pontevedra, Teresa Táboas, centrou o seu discurso da loita pola igualdade das mulleres no nivel político: “A paridade debe ter a súa traslación na política. Precísase feminismo, non só presenza de mulleres. As mulleres que facemos política temos límites pero tamén oportunidades. Podemos comportarnos cos roles do machismo, pero tamén podemos aportar outra sensibilidade, aportando unha política máis humanizada”. Para Táboas, “as cotas teñen o seu sentido, pero cómpre actuar con sensibilidade para levar a paridade aos niveis intermedios”. Ademais, avogou por “dar prestixio e visibilidade ás mullerea s nos medios de comunicación”.
Segundo a candidata nacionalista, “debemos lembrar sempre que a sociedade está formada por homes e mulleres e desde a acción política debemos dotar á sociedade das ferramentas que permitan a conciliación entre vida persoal e laboral”.

“O nacionalismo é igualdade entre homes e mulleres”

Pola súa parte a candidata número dous do BNG pola provincia da Coruña, Ana Pontón, salientou que “se algo é o nacionalismo é defensa da igualdade, queremos que homes e mulleres teñamos os mesmos dereitos e oportunidades”.
Neste sentido, Pontón subliñou “que os dereitos das mulleres tiveron por primeira vez un aliado na Xunta de Galiza” coa chegada do BNG ao Goberno galego hai tres anos e medio.
“Tivo que chegar o nacionalismo á Xunta de Galiza para que cambios importantes para as mulleres, como que accedan á propiedade das explotacións agrarias, establecendo axudas para que cotizaran á seguridade social, para que as redeiras melloraran as súas condicións de traballo, para aprobar unha Lei Galega contra a Violencia de Xénero”, asegurou Ana Pontón.
Por iso, a candidata do BNG pediu que o vindeiro 1 de marzo “é fundamental un maior apoio para o nacionalismo e poder así consolidar e avanzar nunha maior igualdade e dereitos para as mulleres”.

O BNG XA TEN CANDIDATURAS

O Consello Nacional do BNG aprobou as listas e o programa para as vindeiras eleccións autonómicas. As candidaturas nacionalistas irán encabezadas por Anxo Quintana (A Coruña), Teresa Táboas (Pontevedra), Fernando Blanco (Lugo) e Alfredo Suárez Canal (Ourense). Ana Pontón será número dous pola Coruña.

O portavoz nacional e candidato á presidencia, Anxo Quintana, asegurou na rolda de prensa tras o Consello Nacional que o BNG encara as vindeiras eleccións “dirixíndose a todos os cidadáns galegos, aos que son nacionalistas e aos que non o son; aos que falan galego e aos que falan castelán”. “Contamos con todos para pedirlles o seu apoio a unha alternativa nacional, de progreso, de benestar e orgullosa do noso idioma”, asegurou. Para o candidato, os nacionalista son “unha forza política en ascenso”. “Estamos en condicións de obter un resultado histórico e imos ser a forza política que marque a diferenza nesta campaña electoral”, asegurou.


CANDIDATURA DA PROVINCIA DE LUGO

1.- FERNANDO BLANCO ÁLVAREZ
Lugo Centro. Conselleiro de Innovación e Industria. Membro do Consello Nacional.
2.- ISABEL SÁNCHEZ MONTENEGRO
Lugo Sul. Concelleira en Monforte de Lemos.
3.- MANUEL PARGA NÚÑEZ
A Mariña. Deputado no Parlamento de Galiza. Membro do Consello Nacional.
4.- ESTHER LÓPEZ RODRÍGUEZ
Lugo Centro. Pastoriza. Membro do Consello Nacional. Graduada Social.
5.- BALBINO FERNÁNDEZ LÓPEZ
A Mariña. Concelleiro en Foz.
6.- CRISTINA FERREIRO LÓPEZ
Lugo Centro. Deputada no Parlamento de Galiza.
7.- XOSÉ MANUEL BECERRA PARDO
Lugo Centro. Portavoz municipal en Baralla.
8.- DORES FERNÁNDEZ ABEL
A Mariña. Ribadeo. Sindicalista da CIG. Presidenta da A.C. Francisco Lanza.
9.- XOSÉ ANTÓN LEDO PAN
Lugo Sul. Portavoz municipal en Taboada.
10.- LUCÍA LÓPEZ SOBRADO
Lugo Centro. Sarria. Responsábel comarcal de Galiza Nova.
11.- XERARDO LÓPEZ HENRÍQUEZ
A Mariña. Director do CEIP de Cervo.
12.- PILAR PRIETO PITA
Lugo Centro. Mestra en Vilalba.
13.- XOSÉ CHORÉN VÁZQUEZ
Lugo Centro. Concelleiro en Lugo. Membro do Consello Nacional.
14.- PILAR LÓPEZ MARTÍNEZ
Lugo Sul. Militante en Monforte.
15.- FRANCISCO LUÍS RODRÍGUEZ GUERREIRO
A Mariña. Viveiro. Membro da Executiva comarcal. Presidente de Mariña Patrimonio.

ACTO EN CHANTADA


“NUN INTENTO DE REMENDAR O MODELO NEOLIBERAL, ESTANSE GASTANDO MOITOS RECURSOS PÚBLICOS, E PODE SER UNHA AMEAZA PARA O FUTURO”


Xabier Vence, catedrático de Economía Aplicada da USC, vén de ser presentado coma o coordinador dun grupo de expertos economistas que guiarán ao BNG en matería económica e que proporán medidas a tomar para superar a crise. Nunha pequena entrevista, Vence indicounos que nas medidas que se están a tomar polos gobernos “estase facendo un uso abusivo e irresponsábel dos recursos públicos” froito dun “intento de remendar o modelo neoliberal” que pode chegar a ser “unha ameaza para o futuro”.


- Cal vai ser o peso do grupo de expertos que vai aconsellar ao BNG e que vostede coordina?

Hai que especificar que hai dúas dimensións deste grupo. Unha parte do foro que se reuniu o luns ten como misión fundamental o de ser un foro de discusión e de elaboración de propostas pero dunha forma xenérica en relación á crise. Logo, dentro dese grupo hai outro que traballa máis estreitamente na elaboración e na formalización de propostas con maior nivel de detalle e profundidade.

- Como cre que levamos a crise en Galiza e como ve o panorama?

A crise amósase cada vez máis intensa nas actividades produtivas, como era previsíbel. De tal xeito que estamos experimentado un parón moi acelerado da actividade económica nos sectores principais da economía de Galiza. O primeiro sector que sufriu ese parón foi o sector da construción, e con el todos os sectores que producen “ímputs” para a contrución. E agora estamos no momento no que outro sector importante para Galiza sufre ese parón, que é o do automóbil. E no sector servizos tamén se está a notar, sobre todo pola caída do consumo, polo deterioro da capacidade adquisitiva dos salarios. E nos vindeiros meses creo que se agravará máis a situación, e ao haber un parón da actividade, a consecuencia inmediata será o peche de empresas e a reducción de plantillas, co aumento das cifras do paro.

- Como podería explicar en poucas palabras a solución a esta situación?

En poucas palabras é imposíbel, porque é unha crise moi complexa e polo tanto a solución non e simple. Non é que sexa unha crise do sistema financieiro. Non é simplemente unha recesión, senón que é moi complexo porque afecta á configuración do modelo económico que veu dirixindo a economía mundial nestes últimos lustros, e polo tanto é unha crise que require solucións que teñen que ser dadas en múltiples planos. O problema é que a diagnose da crise por parte dos gobernos non é a axeitada.

- Como ve as actuacións que se están tomando para atallar a crise dende o Estado e dende Galiza?

Nese sentido, as decisións, en xeral, son de moi cortas miras. Estase facendo un uso abusivo e irresponsábel dos recursos públicos para cubrir ocos para o burato negro dos últimos anos creado polo sistema financieiro. Iso vai absorber unha cantidade tan enorme de recursos públicos que vai dificultar a dispoñibilidade de recursos para tirar da actividade económica. Estanse tomando decisións demasiado equivocadas e que hipotecan en boa medida o que se poida facer no futuro, porque se busca un remendo ao modelo vixente e a solución require medidas de máis alcance, de cambio do modelo económico.

- E como se tería que gastar o diñeiro público?

Creo que un programa responsábel de utilización do gasto publico para reactivar a economía pasaría principalmente por unha política de gasto público orientado á mellora dos servizos públicos que están en situación de déficit e insuficiencias, como o é o sector sanitario, a educación ou o I+D+i, ou tamén como o son os servizos sociais ou a xustiza, que está infradotada ou a Administración en xeral. Eu creo que o principal programa de gasto público que se debería poñer en marcha é a de creación de emprego público para desenvolver aquelas actividades e servizos públicos nos que hai insuficiencias manifestas xa que iso redundaría na mellora da calidade de vida da cidadanía e na creación do emprego que a través do pago de salarios e de investimentos para poñelos en funcionamento crearía demanda para o sector privado da economía e tamén reactivaría o consumo.

- O capitalismo, tal e como o coñecemos, está morto como modelo económico?

Dicir morto é demasiado forte, pero creo que está claramente fracasado. Creo que o modelo neoliberal conduciu a unha situación de tal desastre económico e tal grao de desorde na vida económica a nivel mundial que cómpre superalo, buscar outro modelo, outra forma de organizar a actividade produtiva diferente á neoliberal. Iso creo que é clarísimo, o que ocorre é que os que toman as decisións en todos os mercados non están convencidos de que o neoliberalismo haxa que pasalo para os sobrados da historia. Efectivamente, todos os que están á fronte dos gobernos dos principais países e economías foron os que estiveron aplicando os modelos neoliberais, e é improbábel que eles apliquen ese cambio de modelo. Así que están tratando de adoptar medidas paliativas que en principio casan dentro do modelo, moito gasto público para salvar os problemas inmediatos dese modelo, e nese intento de remendar o modelo neoliberal están gastando moitos recursos públicos que pode ser unha ameaza para o futuro.Necesariamente vai ter que ocorrer algo nas economías e nas sociedades, e no político para que unha nova xeración sexa capaz de repensar un modelo diferente que supere as eivas do modelo neoliberal.

- Cal é ese novo modelo económico?

Creo que é complexo de describir. Ten que ser un modelo no que o capital financieiro non teña o predominio e a hexemonía absoluta sobre o resto do sistema económico, ten que voltar a ser un instrumento para a dinamización da economía produtiva pero non para estorsionala, e iso implica unha reforma esencial do modelo. Ten que ser un modelo onde a capacidade de compra das familias e das persoas poida progresar paralelo ao aumento da produtividade. Iso quere dicir que hai que esquecerse das políticas da moderación salarial, para que así poidan evolucionar co aumento da produtividade e así o consumo poida manterse baixo condicións reais e non baixo os créditos e o endebedamento.

Hai que crear un novo papel do sector publico do Estado na regulación do sector público e na intervención da economía. Recuperar un papel máis importante no sistema finacieiro, que teña instrumentos de orientación do investimento, bancos ou intitutos de crédito, cara a actividades estratexicas de futuro e non cara a actividades especulativas. E tamén ten que ter un desenvolvemento do estado de benestar onde non o hai, que é en boa parte do mundo.

Todo iso necesítase cunha política fiscal diferente, que vaia na dirección contraria da neoliberal, que ía reducindo impostos ás grandes fortunas e aos ricos e aumentandollo ás pequenas familia. Hai que recuperar un sistema impositivo progresivo que permita unha redistribución das rendas, dende as máis altas ás mais baixas. E para iso o mellor sería a implantación dun imposto ás grandes fortunas para que ano a ano foran revertindo á sociedade iso que foi acumulando nos anos de bonanza. Que máis ou menos substitúa ao imposto de patrimonio que se sacou agora, e que financiaría o incremento do gasto público que se está levando a cabo.

PROPOSTAS DO BNG CONTRA A CRISE ECONOMICA

O XOVES 4 DE DECEMBRO O BNG ORGANIZA UN ACTO EN MONFORTE PARA EXPLICAR AS MEDIDAS DO BNG CONTRA A CRISE ECONOMICA

INTERVIRÁN:

SEVERINO RODRÍGUEZ DÍAZ,
Alcade de Monforte.

ANA PONTÓN MONDELO
Membro da Executiva Nacional.

LUGAR: CASA DA CULTURA DE MONFORTE
DATA: XOVES, 4 DE DECEMBRO
HORA: 20:00 h.

JORQUERA PEDE A ZAPATERO UN "PLANO AMBICIOSO DE INVESTIMENTOS EN LUGAR DUNHA SUCESIÓN DE MEDIDAS A CONTAGOTAS"

O portavoz do BNG no Congreso dos Deputados, Francisco Jorquera, dirixiuse no Pleno ao Presidente do Goberno, José Luis Rodríguez Zapatero, para demandarlle que “presente un Plano ambicioso de investimentos para facer fronte á crise en lugar dunha sucesión de medidas a contagotas”.
Jorquera abriu a súa intervención enfatizando que o BNG nunca estivo a favor do divorcio entre política e economía, e a continuación detívose nos principais temas de controversia no ámbito económico. Nun primeiro termo, referiuse ao debate sobre austeridade ou expansividade do gasto público. Lembrou que xa “na súa investidura defendemos a aposta decidida polo investimento público fronte aos que preconizan a austeridade”.

Máis recursos para as CC.AA para desenvolver políticas sociais
Por iso, puntualizou, remarcamos a importanza da política orzamentaria. “Agora, vosté xa admite a necesidade de recurrir a un aumento da débeda pública para movilizar mais recursos públicos”. O deputado do BNG redundou neste argumento e propuxo “unha aposta decidida polo gasto social e a mellora dos servizos públicos que redunde nunha mellora das condicións de vida da cidadanía”. Subliñou que a maior parte dos servizos públicos son competencia das CC.AA.
“Esquézase do dogma de que o Estado ten que reservar para si polo menos o 50% do gasto público e peche coas CC.AA unha reforma do sistema de financiamento que as dote de máis recursos”. Ademáis, pediu ao Presidente do Goberno que presente un Plano ambicioso de investimentos “en vez dunha sucesión de medidas a contagotas”.


Críticas á máis Ministerios: “practique a austeridade nese ámbito”
Ínstou a Zapatero a practicar a austeridade en noutros ámbitos e cuestionou que sexan necesarios Ministerios en áreas de responsabilidade autonómica. “Non acrecente este erro prometéndolle a Sanchez Vicario un Ministerio de Deporte”.

Redimensionar o ICO e usar a SEPI para participar en empresas estratéxicas

Respeito ao tema da intervención ou non do Estado na economía, tildouno de “debate falso porque a economía sempre estivo regulada. A cuestión é como se regula e ao servizo de que intereses”.
Neste sentido, apelou a Zapatero a redimensionar o ICO “e a colaborar cos Institutos de Créditos autonómicos como o que o BNG propuxo para Galiza”. E “recurra á SEPI para tomas de participación de capital en empresas estratéxicas como REPSOL”. En relación ao entorno comunitario, demandou que se exixa que o Banco Central Europeo e a política monetaria non “escapen do control democrático “, e criticou as actuacións gubernamentais neste sentido. “Xa son poucos os que se atreven a discutir que a súa obediencia cega aos dogmas monetaristas restou rapidez de resposta fronte á crise”.

Rebaixar a IVA para reactivar o consumo
No relativo á rebaixa de impostos ou progresividade fiscal, mantivo a defensa dunha mellor progresividade fiscal e priorizar a imposición directa fronte á indirecta. Convidou ao Presidente do Goberno a seguer o exemplo de Gordon Brown: “rebaixe a IVA para reactivar o consumo, e compense a rebaixa incrementando a progresividade na imposición directa”.

Reptos na UE: defender a volta de Navantia Fene á construción naval civil e un sistema de cotas lácteas xusto para Galiza
En referencia á libre competencia, utilizou unha frase de Durao Barroso para a súa argumentación: “medidas excepcionais ante unha situación excepcional”. Unha idea que se empregou para xustificar “o feito de acudir ao resgate dos bancos ou para que os Estados avalien operacións de crédito de fabricantes de vehículos”.
Por iso, demandou a Zapatero que coa mesma forza defenda na UE que o asteleiro de Navantia Fene volte á construción naval civil que “podería absorver parte do desemprego que se xenera noutros sectores”. E tamén na UE que defenda un sistema de cotas lácteas xusto para Galiza.

20 ANOS DEIXANDO PEGADA


CELEBRA CON NÓS O 20 ANIVERSARIO DE GALIZA NOVA
o sábado 29 de novembro acto público na faculdade de filoloxía de compostela ás 19:30h, logo cea de confraternidade ás 22:30h
apuntate nocorreo nacional@galizanova.org