Entrevista a Paco Neves, candidato a alcaldía do Saviñao
Recentemente a Asamblea do BNG escolleute como candidato á alcaldía; á veciñanza resultarialle moi interesante que nos falases un pouco de ti.
Nacín en Escairón pero aos 6 anos leváronme para Barcelona, onde grazas á tenacidade dos meus pais puiden rematar os estudos de Económicas. Sempre estiven vencellado á sociedade galega na emigración, que nos anos 60 viviu a chegada masiva de persoas do Saviñao. Desde esas datas nunca máis faltei do meu pobo nunhas vacacións e sempre coa mirada posta na miña volta para Escairón, de forma definitiva, cousa que conseguín aos 58 anos, cando me pre xubilei da Nestlé, onde desenvolvín a miña vida profesional, ocupando primeiramente o cargo de xefe de control de inventarios das delegacións comerciais da empresa, e posteriormente fun o responsable do deseño, seguimento e control dos procesos informáticos financeiros–contables.
Cales son entón eses motivos que te levaron ao BNG, e a representar esa postura ideolóxica que defende.
O meu amor por Galiza é de sempre. Nos anos 80 coñecín xente galega adscrita á ANPG. O que escoitaba nas conversas con eles fíxome reflexionar sobre a situación da Galiza. Establecín comparacións entre a ideas e actitudes que mantiñan os cataláns en defensa da súa lingua e a súa cultura coa que se levaba no noso país, diametralmente oposta. Nese intre percibín que a ANPG era un puntal indispensable para defender esas características que reflicten o noso feito diferencial. Tamén reflexionei de que o galego estivo condenado sempre á emigración, incluso en períodos recentes da nosa historia, froito dunha desidia gobernamental na defensa da nosa economía.
É nesta altura cando entras en contacto coa militancia do BNG.
Empecei a militar no BNG aos comezos dos 90. No ano 92 fun elixido responsable local do BNG en Catalunya. Esta tarefa desempeñeina ata o ano 2000.
Dende a túa incorporación ao BNG, que actividades desenvolvidas suliñarías como as máis representativas do teu traballo.
Durante a miña estadía en Barcelona destacaría varios aspectos, a saber: a profundización nas relacións institucionais cos centros galegos existentes en Catalunya para dar a coñecer o noso proxecto; tamén participei na creación dunha sección cultural do BNG para potenciar o coñecemento da nosa cultura; establecín contactos coa cúpula de ERC e de CiU, que se intensificaron a partir da Declaración de Barcelona; no período da miña responsabilidade ao fronte do BNG incrementamos a base de simpatizantes ata os 250 membros. Ao chegar a Escairón incorporeime á nosa asemblea e hoxe son o responsabel local. Tamén, pola miña raiz emigrante formo parte da Comisión nacional de migración do BNG.
Que accións e decisións pretendes activar dende a alcaldía.
O goberno municipal debe partir da premisa fundamental de achegarse á cidadanía, non estar á espera do que o cidadán/a lle veña propoñer ou reclamar; debe gobernar para todos e todas, facilitando información continuada das accións de goberno e de tódalas actividades e noticias que poidan ser de interese para éles. A miña idea é a de que os servidores públicos teñen que sair cada día á rúa cun libreto e un bolígrafo tomando nota das eivas e inquedanzas da cidadanía para facer unha base de datos e traballar na súa solución. Por outra parte, hai que garantir o máis alto grado de eficacia na atención aos nosos maiores e á nosa xuventude desde uns criterios de atención pública para aumentar a calidade dos servicios e minorar os custos. Tamén a cultura e o lecer son básicos para manter unha sociedade equilibrada e comprometida co seu espacio social; é necesaria unha atención específica nestes sectores, que abeiren a mercadotecnia imperante e promovan a imbricación cultural autóctona, sen desbotar, claro está aquelas propostas de calidade alleas. E por suposto, favorecer os programas de desenrolo económico e de emprego para evitar o despoboamento do noso concello.
Clamor social contra a lei de augas
Dentro da campaña informativa que está a desenvolver o BNG contra a lei de augas aprobada polo PP no Parlamento Galego, celebramos duas charlas no Saviñao.
No pasado mes de marzo estivemos en Vilelos e en Currelos, explicándolle aos veciños e veciñas por que rexeitamos a Lei de Augas.
A Lei de Augas da Xunta do PP "vai duplicar ou triplicar o que imos pagar pola auga"
Trátase dunha Lei nacida pola porta de atrás e enxendrada de costas aos veciños e aos Concellos. Aprobouna o PP en solitario a base de rodillo parlamentario e desoíndo recomendacións do Consello Económico e Social e rexeitando as emendas da oposición, empresarios, sindicatos e ecoloxistas.
O princial obxectivo desta Lei non é medioambiental, é recadatorio. A propia memoria económica da norma prevé duplicar os ingresos por este concepto pasando de 34 millóns a 68 millóns de euros. Esa diferenza sairá fundamentalmente dos petos das e dos contribuíntes.
A partires de agora, pagarase polo consumo da auga real ou potencial con independencia da súa procedencia (rede pública ou privada), subtituíndose o antigo "canon do saneamento" por dous novos tributos: o "canon da auga", que pagarán todas as persoas que se abastezan de redes públicas, de traídas comunais ou de pozos particulares, e o "coeficiente de vertido" que se aplicará aos que vertan auga a unha depuradora xestionada pola Xunta de Galiza e que na práctica implicará multiplicar o "canon da auga" por dous
UN DÍA DA PATRIA MASIVO
Era o que o País necesitaba: un Día da Patria Galega masivo para patentizar que esta nación continúa viva e que non vai renunciar a defender os seus dereitos. Unhas 20.000 persoas -algún meio de comunicación sinalou esta como a manifestación máis numerosa dos últimos anos- rebordaron as rúas do casco vello e desbordaron os límites da Praza da Quintana. Unha resposta cívica, festiva e moi emotiva ante as agresións que o Goberno Feijóo en apenas 100 días de exercicio ten perpetrado contra a nación galega e os seus sinais de identidade, a comezar pola lingua.Como adoita dicir o portavoz nacional, "hai pobo, hai vida, hai esperanza".
O discurso de Guillerme Vázquez na Quintana construíuse sobre dous alicerces básicos: primeiro, transmitir a idea de que o BNG está aquí e non vai claudicar, perante o conformismo dos partidos españois en Galiza, que xa andan a argallar unha reforma do Estatuto para consolidar a presenza do noso País na Segunda División do Estado; segundo, espallar coa mesma enerxía a determinación do BNG de combater e vencer o Partido Popular e o que este significa tanto no eixo da política nacional como no plano da política social.
ACCESO A INTERNET, XA!
O acceso a internet no 2009 non é un luxo. Esiximos que non se nos despoxe dun instrumento fundamental para o desenvolvemento rural, vital para as empresas, autónomos, estudantes, demandantes de emprego, para o Turismo, así como para un servizo de teleasistencia aos nosos maiores, nesta zona economicamente deprimida e cunha alta taxa de envellecemento poboacional.
Non nos vale o recurso a un futurible plan non concreto de Banda Larga para toda Galicia fronte ao que xa era unha realidade con dotación orzamentaria dispoñíbel e comprometida e, ademais, cunha experiencia práctica que avala o funcionamento deste sistema.
Por este motivo, o luns 27 de Xullo, ás 12:00 horas, no portelo único do Concello de Monforte de Lemos, procedeuse ao rexistro dunha carta (previamente enviada por fax) dirixida á Delegada Territorial da Xunta de Galicia en Lugo, Raquel Arias Rodríguez, que se fai pública unha vez enviada. Acceso á carta aquí.
FESTIGAL 2009

Movámonos! pola nosa lingua, polo emprego"
A secretaria de Imaxe e Propaganda, Ana Pontón, e a secretaria de Organización, Montse Prado, presentaron en rolda de prensa a campaña do BNG para o Día da Patria, que levará por lema “Movámonos! Polo noso idioma, polo emprego” e na que se prevé unha participación masiva.Ana Pontón asegurou que a campaña do BNG para o 25 de Xullo “está centrada en dúas preocupacións de gran importancia para a sociedade galega, e tamén para o BNG, como son a defensa do idioma e a defensa do emprego neste momento de crise”.
Neste sentido, a responsábel de Imaxe e Propaganda da Executiva do BNG denunciou que “o Partido Popular, á fronte da Xunta de Galiza, está a levar a campaña máis agresiva contra a lingua galega nos últimos trinta anos”. Ademais, criticou “a ausencia total por parte do Goberno de Feijóo de medidas para facer fronte á crise económica, á destrucción de postos de traballo e ao retroceso que estamos a sofrer na corbertura de servizos sociais”.
“Utilizan a Castelao como escaparate pero non cren nel”
Pola súa parte, a secretaria de Organización do BNG explicou que a inclusión no cartaz da frase “Se aínda somos galegos é por obra e graza do idioma”, do libro Sempre en Galiza, “é acaída nun momento no que se está a manipular a figura de Castelao”.
Ademais, Montse Prado subliñou que “a defensa da lingua vai unida a defensa dun maior político para Galiza e á densa da nosa economia”. A este respeito, criticou que “a negativa de Feijóo a que Galiza contara cun Estatuto de Nación fai que teñamos moito menor peso político no debate sobre o financiamento autonómico”.
Por último, a secretaria de Organización, Montse Prado, reiterou que a Mesa pola Normalización Lingüística “ten dereito a axudas públicas, tanto polo número de socios e socias, con case 4.000, como polas múltiples actividades que leva a cabo”.
“A Mesa ten dereito a axudas públicas, goberne quen goberne”, aseverou Montse Prado.