Compostela quedouse pequena

Unha manifestación monumental, un torrente de enerxía colectiva en favor do ben máis preciado da nosa identidade nacional, a lingua galega. Un río humano formado por unhas 25.000 persoas compuxeron un único clamor, un berro cívico que ecou por todo o País e que dixo alto e claro que este País quer galego.

«Paremos os ataques contra o galego», así rezaba o lema co que Queremos Galego -unha plataforma formada por unha miríada de até 700 asociacións do tecido cívico deste País- chamaba máis unha vez ás galegas e aos galegos.

Paradoxalmente neste País, a xente ten que saír á rúa a defender a súa lingua…dos ataques que lle inflixe o seu propio Goberno!!!, aquel que de acordo coa legalidade vixente tería de se ocupar de termar dela e de lle emprestar o máximo apoio.

A manifestación tivo un ton eminentemente festivo e apresentou unha paisaxe humana do máis heteroxénea, con destaque especial para as máis mozas e os máis mozos, garantía de que a lingua non só ten presente -aínda que ferido- senón tamén futuro.

O portavoz nacional do BNG, Guillerme Vázquez, atendeu aos meios de comunicación antes da manifestación partir da Alameda. Nas súas breves declaracións, Guillerme criticou que “o Partido Popular e o señor Feijoo, ao tempo que se adican a poñerlles flores á lingua galega con motivo do 17 de maio, fan o posíbel e imposíbel para que o noso idioma non tire para adiante”.

E como mostra puxo “o que ven de facer o concello de Santiago, gobernado polo PP, poñendo todo tipo de obstáculos e pexas á realización desta manifestación”.Porén, tamén denunciou a dobre linguaxe do Partido Popular e de Feijoo “que ao tempo que se adica a poñer flores á lingua galega, fai o posíbel e imposíbel para que o noso idioma non poida tirar para adiante”.

Guillerme concluíu lembrando que “se somos galegos e galegas é por obra e gracia do idioma, como dicía Castelao”.

O xulgado desautoriza o concello de Santiago e dá os permisos necesarios para o normal desenvolvemento da manifestación do Día das Letras Galegas

“Non só é un ataque contra a liberdade de opción lingüística, é un ataque contra a liberdade de expresión”.

Queremos Galego chama a “Parar os ataques contra o galego”, logo desta nova agresión contra a nosa lingua.

Representantes da Plataforma unitaria Queremos Galego comparecían esta mañá en conferencia de imprensa para denunciar a actitude do concello de Santiago que, con tan só 48 horas de antelación á manifestación convocada para mañá, Día das Letras Galegas, comunicaba a denegación dos permisos necesarios para o normal desenvolvemento da mesma. Isto obrigou a plataforma a presentar un recurso pola vía de urxencia no contencioso-administrativo. A xustiza concedeu todas as autorizacións pertinentes.

A Plataforma unitaria Queremos Galego, impulsada e coordinada pola Mesa pola Normalización Lingüística, convoca a manifestación baixo o lema “Paremos os ataques contra o galego”. Un lema que, segundo explicou Carlos Callón, o seu portavoz, é hoxe especialmente acaído “porque onte mesmo tivemos novos exemplos, mesmo sen precedentes, como o feito de que o concello de Santiago de Compostela tentase obstaculizar, en todo o que son competencias municipais, que esta mobilización se poida desenvolver”.

O concello de Santiago emitiu, a 48 horas da celebración dunha manifestación que se agarda que sexa multitudinaria, unha resolución denegando os permisos para colocar un palco e unha faixa informativa na Alameda, so pretexto de que coincidía coas festas da Ascensión. Denegaba tamén a posibilidade de ter amplificación para as intervencións no acto de feche. Isto último, xa sen indicar motivo algún.

“Nos 26 anos de historia da Mesa nunca nos encontramos cunha resolución semellante, tan disparatada”, afirmou Callón, quen asegurou que “é un ataque  á liberdade de expresión, non só un ataque á liberdade de opción lingüística. Un ataque a que haxa na nosa sociedade diversidade de opinións”.

O portavoz da Plataforma explicou que, unha vez recibida a resolución municipal, que cualificou de “arbitraria e inxusta”, presentouse perante os tribunais un recurso. A resolución xudicial recoñece o dereito a finalizar o acto co palco e coa megafonía e a pór unha faixa informativa, considerando que, do contrario, se producirían danos irreparábeis. “O que fan os tribunais é devolver a normalidade”.

Para Callón, o feito de o Concello agardar a que ficasen tan só 48 horas para a celebración da manifestación denota “a vontade de facer mal do goberno do Sr. Angel Currás, herdeiro, nas formas, do que foi o período de mandato de Conde Roa e, no fondo, no seu desprezo á lingua e cultura galega e ás normas de convivencia”.

Carlos Callón considerou tamén “disparatado” tratar de xustificar este intento de “coutar a liberdade de expresión” por mor das festas da Ascensión cando, lembrou, “nin é a primeira vez que coinciden, nin será a última”. “A culpa é de Rosalía de Castro por asinar a dedicatoria do primeiro libro contemporaneo monolingüe en galego un 17 de maio”, brincou.

Por iso, fixo un chamamento a reaxir ante estes obstáculos antidemocráticos e a que “todos os que temos sensibilidade polo noso idioma, mesmo con independencia da lingua que utilicemos no noso dia a día, participemos mañá nesta mobilización social, para dicirmos alto e claro: Non no noso nome!; para dicirmos alto e claro: Hai que deter estes ataques contra o idioma que nos une, que nos identifica!”

Denunciou, ademais, os impedimentos –a través da Xunta de Galiza– para utilizar o galego con normalidade nos xulgados; a prohibición de que se poidan impartir determinadas materias en galego no ensino; que se estea a “varrer” o galego da educación infantil das nosas cidades e que se dilapiden cartos públicos, “máis de catro millóns de euros, segundo as estimacións máis baixas”, tirando libros de texto só por estaren en galego.

O 17 de maio tod@s a Compostela!

En BLOQUE podemos!

En Bloque podemos! ese é o lema da Convención Nacional que vai celebrar o BNG o próximo domingo 13 de maio.Esta Convención Nacional celebrase co obxectivo de presentar, diante das vindeiras Eleccións Galegas, os eixos principais das nosas alternativas políticas e a Candidatura do BNG á Presidencia da Xunta de Galiza.
En Bloque Podemos quer expresar con clareza que colectivamente somos todo e podemos cambiar todo. En Bloque Podemos conquistar a Soberanía, a Democracia e o Traballo
O cambio político hoxe é imprescindíbel e necesario. E ademais posíbel, máis posíbel que nunca. Ese cambio vaino liderar o BNG. Historicamente o avanzo do BNG sempre se ten traducido no retroceso do PP.

JORQUERA NON TIRA A TOALLA, FEIJÓO SI

Os tres grandes protagonistas da Convención nacional serán Francisco Jorquera, o candidato do BNG á presidencia da Xunta, a militancia da formación nacionalista e as súas propostas e alternativas.

Montse Prado referiuse a Jorquera como un candidato “serio” e “solvente”, unha persoa que a diferenza de Feijóo “non tira a toalla” e ten afouteza para enfrentarse coas dificuldades e formular propostas alternativas para saírmos da crise.

“Jorquera si cre no País, si ten proxecto para Galiza, non como Feijóo”, resumiu a secretaria de Organización.

UNHA CONVENCIÓN CORAL

A Convención mostrará un BNG plural e diverso desde a unidade. “Será unha Convención coral, con 15 intervencións, todas elas cheas de contido. Cremos nos equipos. Cremos na xente. Non é o momento de individualidades ailladas. É o momento de tirarmos xuntos, de tirarmos en Bloque”, recapitulou.

Será unha Convención con propostas. “O BNG si ten alternativas e propostas. Non as agacha como o PP. O PP agáchaas porque está a facer desde o Goberno xusto o contrario do que prometeu cando estaba na oposición”, afirmou.

8 de maio: mobilizacións en defensa do ensino público

O BNG vén de participar na constitución da Plataforma Galega en Defensa do Ensino Público, integrada por distintas entidades representativas da comunidade educativa galega, para responder ás medidas que o Partido Popular está a impulsar contra este servizo público esencial. En particular maniféstase o rexeitamento ao Real Decreto-Lei 14/2012 do Goberno español, a exixencia de que a Xunta non aplique eses recortes en Galiza e que recorra o Decreto por invasión de competencias autonómicas en materia educativa.

Neste enlace http://plataformagalegadefensaensinopublico.blogspot.com.es/ podes acceder a toda a información sobre a actividade da Plataforma e ao seu manifesto fundacional.

Primeiro de Maio de 2012: Por emprego digno, non ás políticas económicas e laborais do Partido Popular

A CIG convoca mobilizacións por todo o país coincidindo co Día Internacional da Clase Traballadora

Afrontamos este 1º de Maio sumidos/as nunha profunda crise económica que afecta de forma moi directa á clase traballadora a través da perda de miles de empregos, redución de salarios, precarización das condicións de traballo, perda de dereitos, etc. As políticas económicas, sociais e laborais que está a promover o PP a través dos Gobernos español e galego, seguindo as directrices de institucións como o FMI, o BCE ou a Comunidade Europea, responden ao seu modelo ideolóxico de economía neoliberal e de defensa dos intereses da banca, dos especuladores e da oligarquía financeira. Contra isto, a CIG chama á clase traballadora galega a participar nas mobilizacións convocadas en todo o país para reclamar emprego digno e rexeitar as medidas antiobreiras que se nos están a impoñer
As políticas, iniciadas polo PSOE e continuadas agora polo PP con máis virulencia, de recorte de gasto público, de deterioración de servizos públicos como ensino, saúde e servizos de asistencia social, de facilitar e abaratar o despedimento, de incrementar a idade de xubilación e reducir a contía das pensións futuras, etc, responden á defensa do mesmo modelo económico de capitalismo neoliberal. Son políticas que non serven para saír da crise económica e que realmente o que buscan é incrementar os beneficios e o poder económico do capital financeiro especulativo, cargando os custos da crise económica ás clases traballadoras.
Temos que rebelarnos contra estas políticas e este sistema económico, esixindo dos gobernos que fagan políticas que realmente axuden a saír da crise e que o fagan desde unha perspectiva favorábel aos intereses da maioría social. Si existen alternativas, si é posíbel facer outro tipo de políticas diferentes como é combater realmente a fraude fiscal, facer unha política impositiva para que pague máis quen máis ten, incrementar os impostos ás rendas do capital, crear unha banca pública que garanta crédito a familias e pequenas empresas, incrementar o investimento público e os salarios como mecanismo de reactivación da economía e xerar emprego, rematar co especulación coa débeda pública pola vía de que o BCE compre directamente débeda ao estados, negarse os estados a pagar a débeda pública ilexítima....
Este sistema económico non garante dereitos básicos e universais á poboación. Este modelo económico e social obriga a clase traballadora a estar permanentemente en loita na defensa dun salario e dun posto de traballo digno; dun ensino e dunha sanidade públicos e de calidade; dunha vivenda para todos/as; dunha alimentación sa; dunha política industrial, agrícola e de infraestruturas respectuosa co medio ambiente... Este é un modelo económico ao servizo dunha minoría social e nestas situacións de crise é cando mellor se pon de manifesto.
Temos pois que loitar por un novo modelo de organización a nivel social e económico, realmente democrático, que sirva aos intereses da maioría social e no que as clases populares e os seus representantes, sociais e políticos, sexan os que fixen as políticas económicas e laborais e non institucións políticas e financeiras ao servizo do capital.
Polo que respecta á clase traballadora galega, hoxe máis que nunca, precisamos poder decidir por nós mesmos as nosas condicións laborais e sociais, por iso esiximos un Marco Galego de Relacións Laborais e Sociais, con competencias plenas, en correspondencia co exercicio do dereito á soberanía política plena da nación galega.

VIVA A CLASE OBREIRA GALEGA

VIVA GALIZA CEIBE E SOCIALISTA

VIVA O INTERNACIONALISMO PROLETARIO

HORARIOS DAS DISTINTAS MANIFESTACIÓNS E CONCENTRACIÓNS:

Comarca: Hora: Saída dende

Vigo ás 12,00 h. Cruce da Doblada

A Coruña ás 12,00 h. Praza de Vigo

Pontevedra ás 11,30 h. Praza da Ferrería

Ferrol ás 12,00 h. Avda. de Esteiro (local da CIG)

Santiago ás 12,30 h Praza Roxa

Lugo ás 12,30 h. Ronda da Muralla (edificio sindical)

Ourense ás 12,30 h. Pavillón dos Remedios

Ribeira ás 12,00 h. Praza do Peixe

Mondoñedo ás 12,30 h. Diante da ECAR

Vilagarcía ás 12,00 h. Casa do Mar

A Estrada ás 12,00 h. Praza do Concello

O punto de información turística non funciona

O BNG d’O Saviñao ten feito un seguimento continuado do punto de atención turística instalado hai uns meses no exterior do concello do Saviñao. Neste tempo puidemos constatar a práctica inoperatividade do servicio, xa que, de continuo, non se pode conectar á web www.rsacra.es. Ademais, hai que resaltar que esta web é dun baixo nivel documental no que se refire ao noso concello, nos ámbitos de patrimonio.  Tan só estaban reflexadas 4 igrexas, cando temos censados 263 elementos de arquitectura civil, 58 elementos de arquitectura relixiosa e 87 xacementos arqueolóxicos catalogados. Un bó número para facer unha escolma ampla. Por último, reflectir que a cita web non ten a posibilidade de escoller o idioma galego.

É lamentable que durante o período vacacional de Semana Santa, no que se rexistrou unha grande afluencia de visitantes non estivese en funcionamento este punto turístico, o que motivou un descontento xeneralizado.

Queremos facer un chamamento ao Consorcio de Turismo da Ribeira Sacra e ao noso Concello para que urxan ao servicio técnico que se coida da instalación para que solucionen de inmediato os problemas que impiden a visualización, así como que se mellore o contido documental da web para que quede reflectida a gran riqueza natural e artística que posúe o Saviñao. E, por suposto, que os contidos podan ser tamén visualizados na nosa lingua.

Sermos Galiza

Hoxe 26 de abril, xa hai un noxo xornal dixital na rede: www.sermosgaliza.com

Ademais, a partir do 17 de maio contará tamén cun semanario en papel.

Fan falla subscriptores, ANIMATE!