ALTERNATIVAS DO BNG ANTE A CRISE E A PASIVIDADE DO GOBERNO ESTATAL

O Goberno do Estado continúa a eludir teimudamente o emprego da palabra crise para designar o que xa ameaza con se converter nunha profunda recesión económica. Esa resistencia do goberno español explícase porque o PSOE non quer asumir a responsabilidade política de ter concorrido ás pasadas eleccións xerais coa negación da crise como bandeira. Negación que era tanto como negar a evidencia. E explícase tamén porque admitir que estamos nunha crise levaría aparellada necesariamente unha reflexión crítica sobre as políticas económicas seguidas até o de agora, por ser estas en parte as causantes do cambio de ciclo na economía. O que o PSOE non quer facer baixo nengún conceito é mudar de política económica, unha política substancialmente continuista a respecto das directrices marcadas por Rodrigo Rato durante os 8 anos de Goberno Aznar.

O BNG si ten alternativas. O BNG si ten unha política económica substancialmente distinta da que preconizan as forzas políticas estatais, a mesma que está na orixe da crise actual.

O PSOE, como antes o PP, teñen practicado unha política orzamentaria e fiscal de carácter neoliberal, profundamente regresiva ao privilexiar a tributación indirecta sobre a directa (co cal no se cumpre o principio de que paguen máis os que máis gañan) e claramente antisocial ao traducirse na perda de posicións das rendas salariais fronte ás rendas do capital.

O Goberno do Estado, con Solbes ou con Rato como ministros de Economía, non tomou nengunha medida para previr o colapso da burbulla inmobiliaria e, polo contrario, teñen promovido un modelo de desenvolvimento baseado no ladrillo e non no investimento en actividades produtivas de alto valor engadido. A consecuencia é o maior déficit comercial do planeta, por enriba do dos Estados Unidos, e consecuentemente unha perda de competitividade da economía do Estado no mundo.

Fronte á crise, as medidas que agora propón o Goberno do Estado –400 euros, supresión do imposto do patrimonio, veladas ameazas de privatización das pensións públicas, incremento das tarifas eléctricas- son claramente contraproducentes. E sono porque, lonxe de ir á raíz da crise, pódena agravar ao reducir a capacidade de intervención do sector público na economía vía recortes fiscais e ao empobrecer aínda máis ás clases traballadoras, que son as principais vítimas do incremento dos prezos e do deterioro dos servizos públicos. Se tedes dúbidas sobre o efecto que sobre as economías domésticas teñen as medidas adoptadas polo Goberno do Estado, non vaciledes en recorrer ao simulador da tarifa eléctrica que ten posto en marcha o Inega: http://www.inega.es/simulador_factura/simulador_luz.php.

Fronte á crise, o que cómpre é levantar un modelo alternativo. Un modelo que pase polo fortalecimento da política social e polo desenvolvimento de políticas públicas ambiciosas. Cómpre unha política orzamentaria expansiva que permita investir máis en educación, en I+D+I e na mellora dos servizos públicos.

Isto non é retórica. É posíbel facelo. É xusto o que está a facer o nacionalismo desde o Goberno galego, con programas como a construción de 45.000 vivendas protexidas no noso país, a posta en marcha dun concurso eólico autocentrado e con participación pública, o reforzo dos servizos públicos de calidade ou a mobilización de recursos produtivos que outros gobernos tiñan ociosos no agro galego através do Banco de Terras.

Ante a crise hai dúas respostas posíbeis. A escapista e irresponsábel dun Goberno do Estado que finxe non ver a realidade e que está a velas vir e a capear o temporal. E a responsábel, a do nacionalismo galego, consistente en apostar por unha economía produtiva e autocentrada desde a utilización de todos os recursos do sector público.

O BNG VOTA EN CONTRA DO TRATADO DE LISBOA E PEDE "UN CAMBIO DE RUMBO NA UE"

O portavoz do BNG no Congreso dos Deputados, Francisco Jorquera, explicou esta mañá no Pleno da Cámara Baixa as razóns fundamentais da oposición dos nacionalistas galegos ao Tratado de Lisboa e pediu “un cambio de rumbo da UE”.

“Precisamente para facer posíbel ese cambio de rumbo votaremos non á ratificación deste Tratado”, argumentou o deputado do BNG.

O portavoz nacionalista fixo a súa intervención despois de escoitar a pouco estensa presentación do Tratado por parte do Ministro de Asuntos Exteriores, Miguel Ángel Moratinos.

Francisco Jorquera comezou cunha breve referencia ás últimas decisións da UE en materia de inmigración e en materia laboral para sinalar que “son síntomas que engadidos a outros fan que a Europa social se bata en retirada”. Subliñou que “é preciso discernir entre a Europa virtual e a real. O BNG está a favor dunha Europa social, dunha Europa máis democrática, dunha Europa que se constrúa desde o respecto e o artellamento de toda a súa diversidade nacional”.

Cidadáns supeditados á economía
Porén, subliñou, o Tratado de Lisboa vai noutra dirección e “por iso coidamos que é preciso un cambio de rumbo”. Criticou o feito de que a construción europea estea supeditada á defensa dun modelo económico “obsesionado por supeditar calquer outra consideración ás reglas da competencia”. “Non estamos a favor do sometimento das persoas ao mercado, pensamos que a economía ten que estar ao servizo das persoas”.

Ataque aos dereitos sociais
Censurou o Tratado porque supón un “novo avance no ataque aos dereitos laborais” da que é boa mostra a Carta dos Dereitos Fundamentais da UE que “progresa nunha dirección de desprotección dos traballadores como é o despido sen causa xusta”.

Défices democráticos
Ademáis, indicou Jorquera, “este Tratado posúe importantes défices democráticos porque pretende retomar o Tratado Constitucional derrotado polos resultados dos referéndums en Franza e Holanda”. Asemade, afirmou que concede un papel menor ao Parlamento Europeo ao “transferir como norma a iniciativa lexislativa á Comisión en detrimento do Parlamento”. O outro défice sitúase tamén na Carta de Dereitos Fundamentais que “está a anos luz non só da Declaración Universal dos Dereitos dos Homes senón da propia Constitución española e da Carta Europea de Dereitos Sociais”.

De costas á diversidade nacional
Sen esquecer, que o BNG aspira a unha Europa que recoñeza toda a diversidade nacional, lingüística e cultural que a conforma. “Unha Europa dos pobos e non dos Estados”. Pero o Tratado só recoñece aos Estados como suxeitos de dereitos políticos, non se recoñecen os dereitos dos pobos”.

No lingüístico, a UE “ignora a Carta europea de Linguas Minoritarias ou a Declaración Universal de Dereitos Lingüísticos”. Criticou que só se asuman como linguas oficiais as dos Estados.

No que atinxe á OTAN, salientou que no Tratado se establece que “a OTAN é o fundamento para a defensa colectiva dos seus Estados membros e a instancia apropiada para concretala o que condena a Europa a una papel subalterno”.

O SENADO APROBA UNHA MOCIÓN DO BNG SOLICITANDO AO GOBERNO QUE NON SUPRIMA A TARIFA NOCTURNA

A iniciativa de Xosé Manuel Pérez Bouza foi apoiada por todos os grupos políticos, agás o PSOE
A Comisión de Industria do Senado aprobou esta mañá unha moción do senador do BNG, Xosé Manuel Pérez Bouza pola que se lle demanda ao Goberno que non suprima a tarifa eléctrica nocturna “debido á negativa repercusión económica que tería sobre os consumidores”.

A moción do BNG foi apoiada por todos os grupos da Cámara Alta (PP, CiU, PNV, Entesa Catalana e Mixto) e só contou co voto en contra do PSOE.

En concreto, a moción do BNG aprobada hoxe insta ao Goberno a que “derrogue a nova modalidade tarifaria de discriminación horaria e reimplante a tarifa eléctrica nocturna, de forma as economías domésticas non sufran unha suba desproporcionada na tarifa eléctrica”:
“Non é de recibo pretender aplicar neste momento un cambio de tarifa que sería lesivo para as economías domésticas”

Pérez Bouza subliñou que “o Goberno ten que ter en conta que o contexto económico actual de crise non é o máis idóneo para proceder a realizar cambios normativos que, indirectamente, supoñan un incremento da tarifa eléctrica inasumíbel e lesivo para as economías domésticas”, xa que poderían incrementar o recibo da luz entre un 20 e un 70%.

Ademais, advertiu de que “a supresión da tarifa eléctrica nocturna prexudicaría gravemente a máis dun millón de familias que están subscritas a este contrato en todo o Estado, dos que unha boa parte (160.000 fogares) en Galiza ”.

Neste sentido, alertou de que a maioría destes abonados á tarifa nocturna “non poderían aboarse á tarifa social que propón como alternativa o Ministerio, xa que terían que contratar unha potencia superior ao umbral máximo que plantexa o goberno (3 kw)”.

Por último, o senador do BNG agradeceu o apoio das restantes forzas políticas e lamentou que o PSOE votase en contra dunha iniciativa “que só persegue que as reformas que se fagan no recibo da luz non prexudiquen aos sectores sociais máis necesitados de axuda”.

FESTIGAL 08


O Festigal consolídase coa súa sétima edición, que terá lugar os días 24 e 25 de Xullo, coincidindo co Día da Patria Galega e tamén festivo local na capital, Santiago de Compostela.

Está concebido como un escaparate cultural, onde a cultura galega e a internacional (tradicionalmente cunha especial atención aos países da lusofonía), manteñen un frutífero diálogo. Vai máis alá dun simple festival de música, xa que conta con charlas, mesas redondas e presentacións de libros -galería das ideas-, actuacións de maxia, tendas de artesanía, de libros, estreos audiovisuais...

O programa musical aposta polos autores e grupos internacionais, así como polos grupos galegos. Outras novidades salientábeis son a presenza, por primeira vez dunha galería dedicada á cultura tradicional galega e a emisión en directo por parte da emisora Radiofusión do Festigal.

En base aos anos anteriores, está previsto que pasen 20.000 persoas ao longo dos dous días que dura o Festigal. Na organización participarán 200 persoas, contando os voluntarios. O Festigal contará con 40 postos de artesanía e tendas, 6 exposicións e 15 postos de xantar e bares.

AVANZO PROGRAMA MUSICAL
En continuidade cos criterios de programación de anos anteriores combinarase a presenza preferente de músicos galegos con doutras procedencias caracterizados pola innovación das súas creacións.


XOVES 24

O concerto do 24 vai preferentemente dirixido á xente máis nova e contará con 4 actuacións:

· Nao (Galiza)





VENRES 25

O día 25 programarase outro concerto con 4 actuacións para un público máis familiar e diverso.


· Quempallou. (Galiza)




Así mesmo, os días 24 e 25 pola tarde haberá Café Concerto con actuacións de jazz, humor, música tradicional e semellantes.

ACTO PUBLICO EN PANTON


Informámosvos do acto público,que se celebrará en Pantón este venres, 6 de xuño ás 20:30 horas no Salón de Actos da Casa da Cultura de Pantón.

Intervirán na mesma:

- Suso Alvarez, Portavoz Municipal do BNG no Concello de Pantón.
- Tereixa Paz, Vicepresidenta 1ª do Parlamento de Galiza.
- Emilio López, Delegado Provincial de Lugo de Medio Rural

TI QUE OPINAS?

NO BNG DO SAVIÑAO TÉMOLO CLARO, E POR ESO, CANDO NOS ENTERAMOS DAS INTENCIÓNS DA EQUIPA DE GOBERNO DE POÑER UNHA CARPA NA PRAZA DE ESPAÑA DE ESCAIRON PRESENTAMOS UNHA MOCION PARA EXPRESAR A NOSA OPOSICIÓN.

· ESTA OCURRENCIA DO PP VAI SUPOÑER OUTRA AGRESIÓN MÁIS AO ENTORNO DA DEVESA.

· NON CONSIDERAMOS NECESARIO TAL UTENSILIO, XA QUE TEMOS ESPAZOS EN ESCAIRÓN COMO O PAVILLÓN OU A PISTA CUBERTA DO COLEXIO QUE SIRVEN PARA FACER CALQUERA DOS ACTOS QUE SE TEÑAN PENSADO FACER NA CARPA

· ESTE GASTO, AO REDOR DE 59.000€, PODERÍA TER MAIORES RENDEMENTOS NOUTRAS INFRAESTRUCTURAS MAIS NECESARIAS, POR EXEMPLO NA GARDERÍA OU NO CENTRO DE DÍA.

A CONTRACORRENTE


Resulta abafante e sintomático o empeño informativo e dos economistas académicos oficiais en manter a sociedade galega na ignorancia e/ou manipulación a respecto dun tema tan crucial como o financiamento da comunidade autónoma. Preténdese xustificar que o mellor dos mundos posíbeis para Galiza é o da actual dependencia e subordinación respecto do Estado Español. A ideoloxía da españolidade e da unidade de España inspiran as manipulacións académicas e o correlato divulgador informativo. Axitan sempre a bandeira dunha suposta “solidariedade” do estado con Galiza, que se manifestaría empiricamente nos resultados da aplicación do sistema de financiamento vixente. Tinxen o seu discurso analítico, de pretensións progresistas, con dados parciais, ocultacións sonoras e conclusións predeterminadas. Unha delas, a fundamental, que somos incapaces por nós mesmos. Só a unidade de España nos garante o noso actual estado de benestar.


Porén, nin o Ministerio de Economía e Facenda nin o Sr. Solbes se atreven a tanto, se teñen que confrontarse directamente cos razoamentos, fundamentados nos propios dados da liquidación do sistema de financiamento que se fai cada dous anos, en concreto o último en maio de 2008 sobre o 2006. Tiven a ocasión de comprobar como a resposta do Sr. Solbes a un meu posicionamento claro a este respecto foi: “No por Dios, no se puede decir que Galicia viva gracias a España”. Nin siquer nas publicacións oficiais últimas do Ministerio de Economía e Facenda se afirma que a aplicación do sistema de financiamento actual provoque solidariedade e nivelación. Foi o nacionalismo en solitario, especialmente grazas aos traballos do economista Xosé Díaz Díaz, quen se atreveu a replicar demostrando a ignorancia, a ocultación e a manipulación que subxacen nos discursos do academicismo sustentador as proclamas axitativas das dereita e esquerda española na Galiza. Son uns auténticos vendedores de propaganda.


O debate na Galiza adiantou en clareza grazas a que tiveron que confrontarse con informacións que nunca ofreceron os que tiñan capacidade e medios para facelo. Felizmente agora sabemos que a carga tributaria soportada polos galegos, como consecuencia do sistema fiscal español, chegou en 2006 á cantidade de 9.041 millóns de euros polos impostos integrados no sistema de financiamento, máis outros 2.584 millóns de euros por impostos non integrados no sistema de financiamento. En total, a cantidade de 11.625 millóns de euros. Unha cantidade que está moi enriba dos 7.592 millóns de euros que lle foron entregados por Galiza na liquidación de 2006 para facer fronte aos gastos por competencias transferidas (Ensino, Sanidade, Benestar Social, fundamentalmente).


A posición do españolismo foi contumaz, perseverante. Visto que a propaganda manipuladora sobre o sistema de financiamento era desvendábel e rigorosamente atacábel, apareceron as Balanzas Fiscais. Máis barullo e complexidade cos dados e co método de análise. Pero tamén aquí as teses conclusivas, na mesma dirección de incapacitar a Galiza para que non acrediten en que vive do seu esforzo, estaban premeditadas antes de elaborar as análises. Novamente hai un clarificador traballo de Xosé Díaz Díaz, denominado “Miseria da Solidariedade”, de próxima aparición en Terra e Tempo, que demostra como unha cousa son os gastos que se nos imputan e outra moi diferente os realmente realizados. O método utilizado para elaborar as Balanzas Fiscais pola Fundación do BBVA para o período 1991-2005, publicadas no ano 2007, representan o exemplo prototípico dunha tese predeterminada. Tan predeterminada que deben saber que, por de pronto, para acadar o resultado oportuno, se nos imputan, en nome dun denominado principio de beneficio, gastos localizados en Madrid como os gastos xerais das administracións públicas, defensa, orde e seguranza pública, ou de organismos como Holding Olímpico, Centro de Arte Reina Sofía, Museo Nacional del Prado, Fundación Thynssen Bornemisza, Fundación Museo Sorolla, Fundación Teatro Lírico... O que se fai para reivindicar a españolidade e anular a capacidade real de Galiza!!!!. Auténtico terrorismo científico, como di Xosé Díaz Díaz.

O PSOE OPONSE Á DEMANDA DO BNG DE REVISAR OS ACORDOS COA IGREXA CATÓLICA "POR RAZÓNS DE OPORTUNIDADE POLÍTICA"

O PSOE opúxose esta tarde no Pleno á proposición non de lei do BNG que solicitaba a revisión dos Acordos subscritos entre o Estado español e a Santa Sede en 1979 para “adecualos ao carácter aconfesional do Estado español”. O portavoz socialista, Señor Quijano, afirmou que “non somos partidarios de abordar a revisión destes Acordos deste forma e neste momento”. Ademáis engadiu que “as razóns principais da nosa posición teñen que ver coa oportunidade e a lóxica política”. A proposición non de lei do BNG ficou rexeitada na votación.
A laicidade, asignatura pendente no Estado español
Na súa intervención perante a sesión plenaria, Jorquera manifestou que “unha das grandes asignaturas pendentes da democracia española é facer efectiva a laicidade do Estado, o seu carácter aconfesional e neutral en materia de crenzas”. Para o parlamentar nacionalista é un tema que non se debe demorar máis despois “dunha lexislatura pasada marcada pola intromisión sistemática da xerarquía eclesiástica católica no debate político”.
O deputado do BNG preguntouse se é lóxico que sigan inalterados uns acordos de hai trinta anos, e que aseguran o financiamento público da Igrexa, e tamén reprochou o feito de que exista un marco Estado-Igrexa católica privilexiado “distinto aos das outras confesións, sendo vinculante para o Estado e coa blindaxe duns Acordos Internacionais”. Amosou o respecto dos nacionalistas galegos a todas as crenzas e confesións relixiosas, “entre elas a católica á que pertencen moitos dos nosos militantes”.
Non á educación relixiosa no ensino público
Criticou o feito de que nun Estado democrático e aconfesional a Igrexa católica “siga gozando de privilexios e de ámbitos de decisión alleos ao control estatal, incluso cando ten encomendadas labores en servizos públicos como é o da educación relixiosa”. Aproveitou para deixar claro que o BNG considera que un sistema público debe educar no coñecemento das diferentes crenzas. “A transmisión dun sistema de crenzas non debe estar incluida na oferta obrigatoria do ensino público, debe impartirse fóra dos centros ou no seu caso fóra das horas lectivas”.
Aludiu ao caso do profesorado de relixión. “Non é de recibo que a Igrexa controle o ensino relixioso e aos profesores pero é o Estado quen asume plenamente o seu custe económico e a responsabilidade do seu nomeamento e cese”. Sinalou que isto “da lugar a todo tipo de arbitrariedades e a conculcación dos dereitos contemplados no Estatuto dos Traballadores”.
Concúlcase o principio de igualdade
Francisco Jorquera puxo de relieve a dificuldade de conciliar o principio de igualdade co feito de que a Igrexa se financie con fondos públicos. De igual xeito, “é igualdade que os contribuíntes que decidan marcar a casilla no IRPF destinada á Igrexa católica, detraigan cantidades do fondo común, polo tanto, teñen que facer un menor esforzo fiscal para custear os servizos de todos?”.
Finalmente, mencionou o traballo do profesor Dionisio Llamazares sobre os Acordos do Estado español coa Santa Sede cuxa leitura recomendou especialmente aos deputados do grupo socialista porque precisamente se pode baixar da páxina web do Partido Socialista. Subliñou que o BNG pretende coa súa iniciativa “perfilar o carácter laico do Estado separando o público do privado”, o que debería recibir o respaldo do PSOE.